Fardinandu Adolfu Gregorovius

19.01.1821 – 01.05.1891

Fardinandu Adolfu Gregorovius, chì hà ghjiratu pà tutta a Corsica è lacatu u racontu di u so viaghju, era di una famidda di ghjuristi è preti di Prussia Uriintali. Studieti tiulugia è filusufia in Könisberg. Fattu si ridattori in u ghjurnali  Die Neue Könisberger Zeitung, missi dopu à viaghjà pà l’Italia in u 1854. U so libru Corsica ghjiscì in dui vuluma in u 1854 . Ci conta l’imprissioni di u so viaghju duranti trè mesi in Corsica. Dopu publicò parichji libra in quantu à a storia di Roma è di l’Italia, incù noti di viaghju. In u 1875 duvintò sociu di l’Accademia di i Scenzi bavaresi è in u 1876 u fecini prima tidescu citadinu di unori di a cità di Roma è dinò sociu di l’ « Accademia dei Lincei ». Toccu u 1880, da Roma indu’ iddu era in viaghju andeti pà parichji sughjorna longhi in Grecia è in Urienti.