G.THIERS

E NIVERE

Parlendu, casca bè chì e duie parte maiò di a cità ch’elle si chjaminu Terranova è Terravechja. A nostra epica hà chjappu u mendu di sparte tuttu in dui : robba, lochi, ghjente, penseru è idee. Ùn parlu micca solu per l’idee o a robba ch’omu compru o ch’omu spera di pudè cumprà. William dice sempre ch’ella vale ancu pè i sentimenti, i calculi matematichi è tutte e manere di dì è di pensà. Hè cusì ch’ellu hè firmatu u nome di Terranova. Oghje Terranova saria a parte più invechjata è Terravechja a più chì hè stata ingiuvanita. Hè strana issa manera di chjamà i lochi ma hè cusì. Ci hè una spiicazione ch’elli cunnoscenu quelli chì ùn anu mai cappiatu a leia cù a cità.

Quessi fighjate li è viderete ch’elli anu l’ochji appanniti. Sò ghjente chì sanu. Hè perciò chì ùn anscianu. Entrenu, sortenu, facenu mottu è passanu. O allora s’elli si arreghjenu, parlanu elli, à diciulera, in modu bruscu è rapidu, è ùn ci hè modu à piazzà ne una. Innò, hè fatta à posta chì l’altru ùn pudessi dì a soia, chì s’ellu parla, Dio ci ne libari..

In tempi abituali, unu chì hè di Bastia –ch’ellu sia nativu o abitaticciu- sà benissimu s’è unu hè di Terravechja o di Terranova. Basta una fidighjata è u cuntegnu vi dice tuttu, puru s’ellu ùn parla.