Versione :

Ducumentu
Traversata di u golfu in battellu

U battellu mette vinti minuti da u portu di Aiacciu à Purtichju è ritornu.  L’occasione di una bella scuperta à gallu di mare.

Sò dece ore. U Ville de Porto mette in marchja i mutori: hà da esse u terzu viaghju di u ghjornu. L’ultimi passageri si imbarcanu in furia chì à mumenti Morgan stacca l’amarre. A ghjente, turisti o di quì si campanu:

“Cù u battellu a ghjente si francanu l’ingorghi”dice u capitanu Antone Filocamo. “È po cusì, a sera, si beienu u so apperitivu tranquilli, senza penseru di vultà in vittura.”

Una piccula girata per vultà è u Portu Tino Rossi si alluntana in u lume matuttinu. Si doppia u fanale ed eccuci in anda per vinti minuti di traversata serena. Ma chì piacè di straià si à u sole nantu à u ponte supranu. Un sciurettu marinu accarezza. Una campa!

In giru i battellucci facenu a corsa è e vele piglianu ver di l’altu.

 U Ville de Porto tira avanti rente à a costa. A piaghja, l’aeruportu di Campu di L’Oru, a torra di u Capitellu spiccanu nantu à u decoru di e muntagne.