Alanu DI MEGLIO

La cave Depeille

In vinaccia veritas

À chì entri in u Cateraghju falendu da Bastia, l’avarà rimarcatu issu casonu agriculu zuffu à scritturi bumbati ?

Oghji ghjornu, a famosa « cave Depeille » in Aleria si vidi sempri ma pari un locu biotu, senza intaressu com’è s’è i lochi facissini u dispettu di a poca primura.

In i libri è in a storia di l’Isula ùn semu à listessi patti. Ciò chì chjamemu oghji l’avvinimenti d’Aleria si pò fà figurà in i quattru o cinqui dati più impurtanti di u XXesimu seculu è l’annalisi, i ducumenti o a litteratura in giru à u fattu hè monda diviziosa. A passata hè cunnisciuta è sempri ripituta : « dopu à Aleria, più nudda sarà com’è nanzi ».

Ùn si tratta di rifà a storia ma Aleria lascia una certa amarezza. Cert’uni dicini chì l’avvinimentu dà l’abbriu à trent’anni di viulenzi – ùn ci scurdemu chì u FLNC sarà creatu un annu dopu – è cert’altri ci vidarani a scuppiata disgraziata ma necessaria da fà senta à un Statu cecu è ciuncu l’inghjustizia trimenda fatta à un’isula ghjunta à cundizioni pessimi di sviluppu. À u mumentu di i fatti, Edmond Simeoni stessu ricusò d’essa cappiatu da unu Statu chì ùn la sapia più è ricusò ogni triunfalismu o dichjarazioni di successu di pettu à i morti è i feriti.

Un’isula sbiutata è disbitata, un’isula rumenzula cù l’affari di l’Argentella o di i fanghi russi. Paria à sti punti chì solu una tunizata pudissi intrunà l’ambiu mediaticu da renda palesa a situazioni. Ghjustu nanzi ùn ci potini nè Libert Bou nè l’Hudson Istitute cù i so raporti da fà viaghjà a Corsica versu un sviluppu chì tinissi contu di a so ghjenti, cù una storia è cù una cultura. Com’è s’è i lochi fussini stati bioti da 9000 anni. U colpu di a « gabbia senza gli ucelli » ùn l’era mancu riesciutu à Mussolini…

Ma in fatta fini, chì valutazioni dà a storia ? Nantu à l’opportunità di fà Aleria unghjunu diciarà a soia. Ma in quantu à a natura di ciò chì inghjinnò l’accupazioni di « a cave Depeille », si ricunnosci oghji a sparità di trattamentu trà Corsi è rimpatriati d’Algeria in quantu à u debbitu d’istallazioni agricula è Henri Depeille ùn piatta più i scandali di a vinaccia cù a famosa « chaptalisation » chì funziunò com’è un aiutu finanziariu piattu.

« In vino veritas » chjocca in Corsica più cà in altrò. Chì fendu a dimustrazioni chì si pudia passà da u scandalu di a vinaccia à un vinu di qualità di nomina internaziunali, capipruduttu di un’idea nova di l’eccunumia, tandu Aleria ùn sarà statu par nudda.

Lochi Mondu , Albiana-CCU, 2011