À bordu di « golondrinas », da a Colònia di Sant Jordi è Portopetro, à sud di Maiorca, i turisti ponu andà sinu à Cabrera pè a ghjurnata chì si pò navigà ci solu cun l’auturizazione.

Cabrera, natura vergine.

L'archipelagu di Cabrera, cumpostu cù un’isula principale, Cabréra, sei isulelle, dodeci isulotti, è scogli à fior d’acqua, si trova à 15 chm à Sud di u capu Salinas, punta strema di a costa meridiunale di l’isula di Maiorca chì ne dipende per l’amministrazione. In quantu à a fauna è a flora, rapresenta tamantu ecosistema isulanu vergine chì cum’è quessu ùn si ne trova, micca dannighjatu da l’omu è chì ùn hà paru nè in Spagna nè in Europa soca.

Parcu naziunale marittimu è terraniu.

Cù a so classificazione di Parcu naziunale marittimu è terraniu dapoi u 1991, più di 10.000 ettare di terre d’isule calcare è di fondi marini da stupisce, l'archipelagu accumpuleghja u numeru di più di 560 spezie butaniche, 200 di pesci è di assai invertebrati endemici. Hè dinù una cala è un puntu strategicu, per più di 150 spezie d’acelli.

In i so fondi marini, i più cunservati di u liturale mediterraneu, duminiu predilettu di e lucerne, i polpi, murene, delfini di mulà, arrigati è cumuni, globicefali neri, capidogli è testudine tonte, ci hè una bella divizia: 162 spezie d'alghe marine, di svertebrati è d’invertebrati cumu u nudibranchiu mughjone. È po ci sò i prati di pusidunie impurtantissime pè a diversità è a pruduttività, chì favurizeghjanu a ripruduzzione è a divizia di e spezie marine.

Fauna è flora nant’à l’isula di Cabrera.

U so spaziu custieru dà l’agrottu di e culunie più diversificate d’acellii di u Mediterraneu occidentale : puffini incinderati, oceanite timpeste, acule marine d'Audouin, marangoni, acule piscatore è falchi d'Eléonore ch’omu trova ingiru à l’isulotti, è cetera...

A fauna di terra hè supranata da 10 sottuspezie di buciartulucce chì stanu custindi, è trà quesse l'endemica « sargantana balear », una buciartuluccia nera.

È a flora di u Parcu a cumponenu 516 spezie di piante vasculare, 22 spezie di murze è 21 spezie di lickens. Vinti spezie sò endemiche di l’isule Baleare è una sottuspezia, « la rubia angustifolia subsp. Cespitosa », hè endemica de l'archipelagu di Cabrera. E spezie butaniche più interessante sò u Rhamnus di e Baleare, a pigonia di e Baleare, è cetera...

Visite cun arregulamentate.

L'arcipelagu essendu duminiu militare, hè interdetta senza eccezzione alcuna di praticà a ciuttata sottumarina cun buttiglia è dinù a pesca spurtiva, di sbarcà l’animali è di fà u camping, di coglie piante, minerali è spezie prutette.