Versione :

Ducumentu
A ghjente muntagnola

A storia di Sartè hè marcata da tanti cunflitti. À u centru di e litiche è intuppi ci hè sempre statu u pusessu di a terra. A mandopera à bon pattu i sgiò prupietarii l’anu fatta vene da i paesi muntagnoli : pastori è agricultori cusì anu lacatu i so paesoi longu à i seculi è sò venuti à stà in u “Borgu” di a cità, vene à dì fora di i muri. Sarà per quessa chì i storichi vedenu (à sente à Catherine PETR, Strade n°3, 1995) i raporti trà citadini è muntagnoli di issi rughjoni cum’è cunflitti strutturali chì ricollanu à i tempi landani di a storia.

A ghjente sartinesa oghje dice di esse ligata assai cù a muntagna vicina l’Alta Rocca è si frequentanu à l’occasione di parechji avvenimenti suciali (matrimonii, feste, interri). Ci hè dinù l’attività di u cumerciu di i prudotti campagnoli, è po e passighjate, e castagne, è cet...

A ghjente di a cità ramentanu ch’elli sò pè u più nativi di issi paesi (Zicavu in particulare) ma si definisce assai da Sartinesi sputichi.

Anu l’idea di esse ligati assai à a ghjente di l'Alta-Rocca è Portivechju è à ciò chì pare sò più alluntanati da Zicavu, Prupià è Bunifaziu, bench’elli sianu vicini quessi custì.

Dunque i Sartinesi si dicenu vicini da "Rucchisgiani".