In a settimana santa, dopu a benedizione di e palme chì si presentanu sottu forma di crucette è palme intrecciate si face a prucezzione tradiziunale è dopu vene u rituale di e porte chjose ed aperte chjamatu l’ “attolite portas ". Dopu stu mumentu a ghjente si porta in casa e palme è affari benedetti da ghjuvà per prutege si.

In Corsica, e ceremonie di u Ghjovi è u Vennari Santu sò festighjate cun primura è fervore è e prucessione ne sò a marca più spettaculare, cun abiti rituali, infilarate di fideli è canti sacri cunnisciuti è cantati da una bella parte di u populu.

L’usi sò accumpagnati da i materiali è ogetti rituali: e ragane, e ratachje o  trapachje chì annunzianu l'iniziu di l'Uffiziu di e Tenebre, ingiru à un candileru à triangulu chì porta 15 candeli. Si spenghje un lume dopu cantatu un salmu, sin’à l’ultimu è tandu hè bughju in a chjesa. Hè tempu di mette in ballu ratachje è pichji di bastone nantu à u pavimentu di a chjesa.

E cunfraterne sò in primu rangu à fà scandu ad ogni stonda di u rituale è à curà ch’ella sia porta ogni cosa necessaria: palme, fiore, sumente, granu è lentichje posti davant'à l'altarini.

A Settimana Santa si compie cù a festa di Pasqua, è  e so pulizie di casa è i so biscotti rituali.