I teatri antichi, sia rumani sia grechi, eranu à l’apertu è fatti in armunia cù a natura, spessu in un situ straurdinariu. Dopu, durante a Rinascita, si fecenu e prime sale chjose è issu particulare sparì.

I teatri antichi più belli sò in Sicilia. Quellu di Siracusa hè zuccatu in a petra di un pughjale bassu. Oghje trà a costa è u teatru ci hè un quartieru goffu assai di a cità. Omu hà u so da fà à pensà chì custindi, Escile ci hà creatu I Persi è Epicarmu ci hà inventatu a prima cumedia.

Quellu più cunnisciutu hè in Taurmina. Hè per via di u situ magnificu, à piccu nantu à u mare è davanti à l’Etna, massicciu è bughju assai.

U solu teatru anticu sempre tale è quale hè in Segeste. Da parte, francu da qualsiasi mullizzu, à dui chilometri sopra à u tempiu, in cima à u monte Barbaro, in una campagna deserta è salvatica, si ne stà sopra à campi brusgiati.