Una volta ci era un pastori chì facia u so brocciu. Soca sarà statu in Lavudonacu.... Ghjunghji u diavulu è dici:

O mi dai i to casgia o ti piddu i to pecuri! Mi darè tutti i casgia chì tù farè duranti u mesi!

U pastori facia i so casgia è t’ hà avutu l’idea di fà calcosa incù u latti fattu è cussì hà fattu u brocciu. Quand’iddu hè turratu u diavulu, tutti i casgia erani culà à siccà, ma ci erani ancu i broccia fatti da u pastori.

U diavulu fù ghjilosu, hà vistu chì u pastori cuddia u brocciu quand'iddu fiuria è vinia à gaddu, ma lacaia u seru. Tandu hà dittu: S’iddu fussi meiu u seru, saparia chì fà ni eiu! Ma ùn hà micca dittu ciò ch’iddu t’avia da fà incù u seru.

Dopu hà dittu:

- Aghju à turrà è piddà ciò chì hè subbra!

Ma u pastori avia postu i carotti! È cussì u diavulu ùn hà avutu cà i codi! Tandu hà vulsutu arà a tarra da par iddu, hà purtatu l’aratu ind’u stazzunaru pà fà arrutà a vomara.  Ma u stazzunari hà fattu quiddu chì piddaia a vomara è hà lacatu cascà a mazza à nantu à a zampa di u diavulu. Tandu hà missu à briunà, pidda a mazza incù una mani, l’alcudina cù l’altra è po i lampa culà! A mazza hà fattu un tafonu  chì podassi hè u lavu minori di Lavudonacu è l’alcudina si hè firmata culà insù, à nantu à u Cuscioni. A vidi chì tutta a muntagna culà insù si chjama L’Alcudina!

Eiu dicu ciò ch’iddu cuntaia Zi’Ghjumbattistu Mattalò!

Fonti: Quaterni di Antrupulugia n°5 pagina 66, Museu di a Corsica