Versione :

Ducumentu
Aléria : U Riacquistu

U RIACQUISTU

Vene chjamatu « riacquistu » u periudu di u dopu 70. Ùn tocca micca solu a literatura ma marca un rinnovu culturale assai più largu, accumpagnatu da un muvimentu largu di regiunalisimu di prugressu.

Dopu à e nove pruposte ortografiche chì portanu l’adesione di tutta a nova generazione di i cursisti (1971), nasce un chjerchju di giovani scrittori chì, senza propiu rumpitura, anu da circà di trapassà u solu mantenimentu dendu un abbriu novu à a literatura corsa.

Cusì fù creata Rigiru in u 1974. Era una rivista di literatura corsa chì accuglia i scritti di tutta issa nova generazione. U prugettu di u settanta dichjara u corsu una lingua è a vole trae ver’di campi novi è alti di a literatura. Hè tandu l’affirmazione di un’ ambizione pè a lingua è a spressione literaria. U principiu fundatore hè di ciuttà in u geniu patrimuniale di a lingua di modu à adattà lu à un dì artitiscu creativu di qualità. À stu livellu, si pò dì chì issa generazione riesce a scumessa data di l’illustrazione è di a messa in prova di e qualità autonome è interne di a lingua corsa.

Nasce cusì una pruduzzione di qualità, marcata da l’indiatura (ingagiamentu) chì lea literatura è prugettu di sucetà. Spulvariti da u mantinimentu, affrancati di più da l’angoscia diglossica, l’autori novi di issu periudu ponu esse cunsiderati i fundatori di a lingua corsa, postu chì ùn hè ch’è tandu ch’ella hè dichjarata tale è aduprata cum’è tale.

A puesia è a prosa vanu à invistisce duminii è temi altri, aperti chì ponu andà al di là di a Corsica, in forme rinnuvate chì tiranu prò di a furmazione più avanzata di i literati chì facenu move issa spressione artistica. Iss’andatura andarà à nutrisce ancu u cantu chì, in listessu muvimentu, ritrova forme anziane ma ciotta in a puesia nova per accuncià una creazione muderna. Si vedenu l’effetti dinù in l’insignamentu chì trova quì base di norma più ricche è ferme di modu à custruì vie didattiche.

Issu muvimentu ùn si pò dì s’ellu hè compiu  o s’ellu hà chjappu oghje vie altre, postu chì a divizia literaria corsa hè ghjunta cunferma da l’anni 90 cù una pruduzzione di qualità mantenuta è una crescita di publicazione.