Ragiunata
A caccia in Corsica

Ma chì raprisenta a caccia pà u corsu ? Com'hè ch'iddu ci fussi tanti cacciadori ?

A caccia hà un pesu impurtanti in Corsica; si pò dì ch'idda faci parti da poi sempri di a noscia inturnianza, di a noscia manera di campà è di a noscia cultura. I cundizioni siorichi, culturali, suciali è ecunomichi poni spucà issu fattu.

U Corsu hè statu vicinu da l'arma, sighi pà difendasi o pà pruteghiasi da l'invasori o ancu da u vicinu (vindetta), sighi pà caccighjà pà bisognu o nò, sighi pà fistighjà (alizzioni, nasciti, festi, matrimonii..), sighi pà fà mali (arrubbera, affari brutti..). Ancu oghji sarani pochi i casi chì ùn ani un fucili appiccatu à u chjodu.

A trasmissioni di u stintu è di u spiritu di caccia hè stata tramandata da a cumunicazioni. Cumunicazioni verticali incù i vechji, i parsoni maiò chì participighiani à l'educazioni di i ghjovani è chì sò i raprisintanti spirituali di u stintu è di u spiritu di a caccia. Cumunicazioni urizontali incù i cacciadori più o menu attimpati chì dani l'asempiu è portani incù iddi issa lascita di l'anziani. Raprisentani l'arrimbatoghju reali di u stintu è di u spiritu mintuatu. Issa manera di pinsà, di raghjùnà, di cumpurtassi, nanzi, duranti è dopu a caccia hè un elementu fundamintali di a noscia cultura è participighia à mantenala è à sparghjala naturalmenti.

I cundizioni suciali è geografichi facini chì u corsu hè statu più un omu di campagna chè di cità. L’agricultura è l'allevu ani tinutu una bedda parti di l'attività umana duranti iss'ultimi seculi, sinu à qualchì dicina d'anni fà. A geograffia di a Corsica hà multiplicatu l'unità di splutazioni in ghjiru à i paesi di piaghja è di muntagna. U cuntattu incù a natura hè statu vissutu naturalmenti. U stintu di a caccia vinarà anch'iddu da quì ? Sò pochi l'agricultori è i pastori à stà indiffarenti à a caccia, issendu tutti i ghjorna in a machja o vicinu à idda. U so parintatu è u so vicinatu sò intricciati in issu buliumu di natura, animali, machja è caccia.

A Corsica hè un paesu dittu "povaru". Sarà statu ancu innanzi, ma a fiertà faci piattà a verità. L'ecunumia ùn hè mai stata sviluppata. Era pà u più un ecunumia di campera. Ugnunu pugnava à stintassi u so pani incù l'agricultura, l'allevu è i ghjurnati pacati o rimpattati incù a robba. A caccia sarà stata ancu una manera di buscassi qualcosa in più (un bisognu) è una manera di sminticà a difficultà di a vita (un piacè).

Ernest Papi, Extrait de la revue « A pian d’Avretu » n°18, mars 1995