Versione :

Parolla chì trimuleghja

Traduzzione da

Sarà dinù voglia di campà
O una morte luntana
Chì rinvivisce a vistica
D’una antica caccia
Issa parolla chì trimuleghja
À i catari di u sangue ?
Era ardore crosciu
Petra pinzia erba fiore
Oghje hè foscu furore
Parolla atroce ghjettata
À u naufragatu chì si perde
È u gridu anticu rinnova
U corpu annegatu si cappia
L’ochji a bocca e bracce
I basgi i sguardi e carezze
I silenzii pindii e briachezze
Po fala è spone e vene
Abbagliuleghja sprufonda squaglia
Sillaba à sillaba : t’a-do-ru…
Rispunta l’antica pena…