A pulitica

A Demucrazia cristiana hè stata impurtantissima durante a Guerra freta chì era vista cum’è prutezzione contru à u cumunisimu ma issu partitu hè statu accusatu di arrubecciu nantu à l’elezzione di u 1992 è da issu fattu discreditatu assai.

A Rete, partitu rifurmatore di Leoluca Orlando ne hà prufittatu è si hè indiatu contru a maffia è a curruzzione. In u 1994, Silvio Berlusconi hà vintu l’elezzione cù e forze di diritta ma u so guvernu ùn hà tenutu un annu.

Oghje hè una situazione incerta è esciuta chjara è sicura ùn si ne vede.

L'emigrazione

«Chi n'esce rinasce» dice u pruverbiu. Trà u 1950 è u 1970 sò stati un miglione di Siciliani à parte fora luntanu da u paese. I cunsulati taliani pè u mondu contanu scritti più di cinque miglioni di Siciliani; trà i 500000 stallati in l’unione europea u più stanu in Alemagna,  Francia, Belgica è Inghilterra.

Trà i 25 miglioni di ceppu talianu à i Stati Uniti, 18 miglioni sò nativi di a Sicilia. Da u 1991, sò tanti è tanti immigranti albanesi chì entrenu in Sicilia, è ùn si contanu i piscatori di Tunisia è di u Maroccu chì pescanu in modu illegale longu à a costa di Trapani. 

L'agricultura

Saranu 40 % l’abitanti chì travaglianu a terra è danu 20 % di u revenutu rozu. Un quartu di a flotta di pesca taliana hè di Sicilia, in i porti di Trapani è Mazara. L'internu pè u più rurale è a costa, più industrializata in fatti si spartenu l’ecunumia. Ci sò l’aranceti di qualità, ma si importa u suchju di aranciu in scatula chì da u Maroccu l’agrumi sò menu cari.

A pruvincia di Ragusa hè un mudellu pè l’allevu, i frutti primaticci è a viticultura, i legumi è i fiori.

L'industria

E stallazione anu imbruttatu u liturale è l’acqua di u mare. E rafinerie di petroliu è l’usine petrochimiche raportanu sopra à tuttu à l’industriali milanesi.

Fù un tempu, à l’epica di Mussolini, chì a custruzzione di matrali impurtanti era un prugettu chì prumettia u sviluppu. Dopu ci hè stata a speranza in quantu à u petroliu, è po a cultura in serre, è po l’irrigazione, è po a frebba di a custruzzione.

Oghje si parla di l’ecunumia turistica è di un ponte tamantu da fà per sopra à e bocche in Messina.