Acà trent'egn

Tu to ere na joeneta e giö demò n pop,
fame n bos, to dijeve da spess e trop.

E giö te bossave, mare, fort, fort con pascion
scheche demò n pìcol sà far dalbon
Giö jive ben a me matear jun cort
pricolà sun chel bedoi delà da ort
O ence entorn, te dut a sfrugnar
che che semper te ciasa se vegn a dorar
Te sentive chiamar ... da doman, da te let;
Che élo po mama?" domanave chiet;
E da te ruava n'aicia sui ciavei doré.
Co fajeve a saer de tiöi menuc conté,
Co fajeve a saer che dò padir e dolor
Sun sava de usc la mort spetava to cör?

Tu to ere na joeneta e giö demò n pop,
fame n bos, to dijeve da spess, e trop.

L pare no l'era, demez l'era a bast
la fenestra era orida e da l'or de la riva
vegnìa n sonar de bronsins.
Na àmeda era ruada, che fajea, che luraa
La vegnìa con ega doicia, sciropes, tisane ...
Tu to vardave l soreie e le crepe lontane.
Te n fià to me as dit: "Sun piaza via scola
te speta to sor, no la lasciar sola,
Cor a la tor, l'àmeda fasc delvers
Vegnì su ensema con vosc pare isnet "...
L'era de jugn, l'era Pasca de Mé
L'é trenta egn doman, vösto che vegne da te?

Tu to ere na joeneta e giö demò n pop,
fame n bos, to dijeve da spess, e trop.