Versione :

Che brusta buffadda

A volti lu chi si perdi furriegghja,
si canta. A volti po’ essè un’ispiga,
una mura mura, unu sfraìzzu
di culora i la saìna a cumpunì
accordi, noti, strazii
di l’ammenti di li fogli stirruddi
sottu a li tratti di ca’ in pressa parti.

Magari sarà pa’ chissu chi certi
notti intendu, lenu, tunchjà
l’innommu toiu cumente magèndula
d’eva innantu a cubarturi, e la cara
ti carignu e pari eva chi fugghj da li diddi.

Tu, ca’ lu sa undi sei,
cosa fai, a ca’ pensi. Eppuru a volti
m’accendi la mimoria
cumente brusta buffadda
chi lu tempu non istuda né sfini.

La fiara chi dèbili s’avviara
ha la friscura d’anni chi no emmu,
ma a me piagi, e mi scaldu
che tandu lu matessi a lu prufummu
arestu di lu corpu
toiu imburracciaddu da l’amori
appena accoltu. Trinigghegghja bianca
una lugi i l’attesa
di un pinsamentu toiu
chi no soggu si pa’ me mai vi sarà,
parò mi l’immaghjnegghju,
e indossu intendu cumente
un calori dolci di brasgieri.