Amezizia

L mie l cunfin ie n fussel sun l'ega
La striscia blancia dl bastimënt pelegrin
Ulá se n mucia pa l viandant namurá
Ie son l'auter y l scunesciú

Da fosch a blanch se stramuda l mie l cunfin
Y se vën tan bën sciche di y nuet
Y mucia sota la udledes di depenjadëures staniëi
Ie son l'armunía dl cuntrast

L mie l cunfin ie ti var sun la tiëra
La fustía che te lasces
Y che sfanta a uni plueia da nuef
Ie son l' jí y l' uní

Chësc fil sutil de scrit ie l mie l cunfin
Che ntaia la plata blancia
Y che mucia da man ciancia a man drëta o dala drëta ala ciancia
Ie son la bona nevela

L mie l cunfin ie l' urizont sajiëul
Che tira l bunder da dalonc sota l surëdl aut
Y che mucia a uni sdramoz
Ie son l daujin y l dalonc

L possa stlaië di o vester danterëures l mie l cunfin
L' etiërn troi dl tëmp tla storia
Che zitidlan se n mucia
Ie son l dauní

L mie l cunfin ne n'ie no ruf no mont
Ajache sëura la sëides dla persona òra ie la persona
Tl crí dulënt de si virtú
Y che ti mucia cun snait
ala mbraceda safuiënta di cunfins dla persona