Santa Riparata di Bonifaziu
Ùn ci voli à marchjà tantu da scopra issu edifiziu stupendu chì ùn hà ancu cappiatu tutti i so sicreti...
![](https://www.interromania.com/sites/default/files/styles/image_548xx/public/banner_dscf1594.jpg?itok=JcOrruig)
Saria di l’IXu seculu, veni à dì prima chè a cità di Bonifaziu fussi stata edificata. Parechji ipotesi parlani di a so funzioni di pettu à i pastori è i cultivatori di issi lochi. Hè stata ristaurata tali è quali com'è nanzu, in u 1983. Ma hè firmata sola è senza pussibilità d’accessu.
« À l’incuntrariu di ciò chì si pudaria pinsà, a pulicrumia di i petri d’urighini ùn era micca pà un scopu esteticu ma imposta da u fattu chì issa cappedda era stata fatta à u limitu trà calcari è granitu, à tal puntu chì l’operai, racugliendu i i petri chì li ci vulianu, è chì –segnu d’arcaisimu- ùn sò taddati chè pocu pocu, l’anu chjappi à quandu bianchi à quandu russicci in granitu.
Santa Riparata quali era?
A lighjenda dici chì issa ghjovana si ni scappò a sera stessa di u matrimoniu ch’edda era stata furzata à fà. Vulendu stà virgini, stà anonima è dà si sana à u Signori, circò un agrottu in un munasteru... d’omi vestendu si cun panni d’omu !
Piuttostu chè di palisà u so sicretu, si lacò accusà d’un ingannu ch’edda ùn pudia mancu à pena avè fattu, è fù arristata è po tumbata. A verità ùn si scuprì cà dopu à a so morti è, in segnu di riparazioni, li si deti u nomu di “Riparata”.
In Corsica hè dinù chjamata Liberata (liberata di qualsiasi suspettu) »