Ragiunata
In cità

*En ville

Vincenzu Mariotti : - Ùn hè micca per diciulà, ma chì sussurru ! Ci hè da diventà sordu è cioncu !
Ziu Simone : - È chì puzza ! Quantu ci ne sarà vitture in Bastia ?
Lucia : - In una famiglia sò duie, o trè vitture. Una famiglia sò trè persone in generale. Cinquantamila abitanti. Allora, femu a divisione : Cinquantamila via dui..
Petru Maria : - Trè !
Lucia : - Cinquantamila via trè sò quasi dicesettemila ! Dicesettemila famiglie, duie vitture à famiglia...
Petru Maria : - Trentaquattrumila scappamenti di vitture ! Dunque, a cità puzza è hè nurmale.
Ziu Simone : - Ma hè per quessa chì ùn ci falgu tantu.
Vincenzu Mariotti : - Mancu eiu : aghju poca primura. Alè, ci ne andemu ?
Ziu Simone : - Iè, ma di prima, vò ind'è Campodonico à cumprà un falcinu.
Vincenzu Mariotti : - Vengu ancu eiu, à piglià u prudottu pè i topi.
Francesca : - È dopu, prima di parte, vi cansate in casa una cria.
Ghjuvan Paulu : - È vi fate una affaccata ind'è mè !
Lucia : - Ind'è tè ? Troppu luntanu ! A` francà tutta a cità, à st'ora quì, ci vole una meza ora !
Ghjuvan Paulu : - Caccia ne à pena, o Lucì ! Eiu ci mettu à u più vinti minuti. È contu indrentu l'ingorghi è quella stundarella da circà un postu pè a vittura.
Ziu Simone : - Ma allora, ùn stai più nantu à A Marina.
Ghjuvan Paulu : - U vechju portu, Carrughju dirittu, U Mercà è tutti issi carrughji, quelli chì ponu scappà scappanu.
Lucia : - Sò lochi da turisti oramai. Ci si veghja assai di notte tempu è si dorme ancu di più a matina.
Ghjuvanni : - Cum'è in Sardegna, in e cità liturale.
Ghjuvan Paulu : - Allora, stò in Furiani. Una casuccia cù un pezzu di giardinu. Mi facciu i mo legumi è mi godu l'asgiu di a campagna.