Chì scontru stranu ! ....

 

Chì scontru stranu ! ....

 

 

Corti, cità famosa pè a so storia ma dinù pè a so università, alza i so vechji muri in core di l’inciuttatura centrale chì taglia l’isula in dui : u di quà da i monti è u di là da i monti. A storia di sta cità chì supraneghja a valle di u Tavignanu currisponde à u so passatu militare. A so pusizione centrale, à a cruciata di i chjassi, a presenza di l’armata genuvese - o piuttostu i mercenari furesteri imprestati à Genuva, l’armata imperiale è po francese - in i presidii facenu di Corti a capitale naturale di l’isula. Ma a cità fù dinù u capulocu puliticu, amministrativu è intellettuale di a nazione fundata da Pasquale Paoli. Una situazione rinfurzata da u guvernu di « u babbu di a Patria » chì crea una stamperia naziunale è face apre u trè di ghjennaghju di u 1765 un’università.  Oghje, a cità conta in giru à 7000 abitanti ma cunnosce una crescita l’inguernu incù a pupulazione studientina ma dinù l’estate incù a scalata di i turisti. Dapoi trè anni faciu parte di a populazione studientina chì cerca à custruisce si un avvene bellu è sirenu, vale à dì avè un impiegu chì mi piaceria monda, senza avè bisognu di parte in cuntinente à stantà mi u pane.

Dui anni fà, à l’entrata di l’estate, mi hè accadutu un affare strasurdinariu chì, ancu oghje, mi stringhje lu core ogni volta ch’o ci  pensu. Spassighjendu in a cità, annant’à u corsu Paoli, è affannata da u caldu, mi pusai una stonda accantu à una funtana per beie appena d’acqua fresca. U tempu era bellu è a sciappittana nancu ghjunta chì digià i turisti eranu rossi cum’è pumate mature. Ghjè stu periudu di l’annata quandu a cità hè invasa da i turisti è chì i studienti sò sempre quì chì l’annata sculare ùn hè nancu compia. Ci era un rimore tamantu trà e trombe di e vitture, i zitelli chì ghjunghjianu da a scola è un gruppu di turisti chì si maravigliavanu davanti à dui giuvanotti chì ghjucavanu à a mora. Ed eiu, sempre pusata nant’à e petre chì chjudianu a funtana, purtai a manu sott’à l’acqua è avvicinai e labre pè caccià mi sta sete tamanta chì mi stringhjia a cannella. Pensai à stu mumentu chì st’acqua era benedetta tantu ella era fresca. A sete cacciata alzai u capu, l’ochji chjosi. A cità paria esse si viutata d’un colpu chì rimore ùn ci n’era quasi più. Si sentia solu a voce frala d’una donna chì cantava accant’à mè. Aprii l’ochji è ciò ch’o vidia ùn pudia crede ch’ellu fussi veru. E vitture, i magazini è i turisti eranu smarriti. A donna cantendu accant’à mè era vestuta di neru incù un mandile in capu, cum’elle eranu vestute e nostre caccare à u seculu scorsu. Nant’à strada, una mula trascinendu una carretta avia rimpiazzatu u rimore di e vitture. L’omu chì viaghjava accant’à l’animale era giovanu ma paria digià stancu da u travagliu. S’avvicinò di a funtana è chjamò a donna chì cantava : « O Anna Marì ! » Quella avia u so chè da fà à pisà u stagnone pienu d’acqua.

« -     A ci faci ?

  • Iè o Antò, ti ringraziu !
  • Ci femu una spassighjata ?
  • A sai ch’ùn possu micca chì oghje hè sabatu, hè u ghjornu di u pane ! 
  • Va bè, aspetteraghju sin’à dumane allora… »

A donna pisò u stagnone, u messe annant’à u so capu, è marchjò vultendu mi e spalle. Nimu avia vistu ch’o era pusata quì. L’ochji sburlati fighjulava u carrughju, a ghjente senza pudè crede à ciò ch’o vidia : a cità di Corti cent’anni fà ! Dui zitelli ghjucavanu inseme, incù quasi nunda - chì a ghjente di l’epica ùn era tantu ricca – ma parianu cuntenti. A mente di i zitelli hè carca d’imaginazione, di storie è di creatività ch’un pezzu di legnu li basterebbe pè ghjucà. Ed eiu, spettatore è testimoniu di sta spezia di teatru-verità, ùn pudia esse ch’in traccia di sunnià è forse chì u caldu m’avia scimattulita. Mi vultai torna versu a funtana pè rinfriscà u mo capu, bullente sott’à u sole. Ma ùn ebbi u tempu di purtà a manu piena d’acqua versu u mo visu chì digià si facia sente un rimore tamantu. Ritruvai tandu listessa ghjente è listesse vitture chè prima. Senza pudè mi arrizzà, eiu stava custì, fighjulendu l’intornu. Pensava à a vita di tandu chì paria ùn sò quantu simplice di pettu à a nostra sucetà muderna. E relazione trà a ghjente è i valori murali eranu chjari è ognunu t’avia a so funzione in a sucetà. A strutturazione sessuale di u spaziu dava à ognunu a so funzione è a so piazza di pettu à l’altru. A donna trascinava l’acqua, facia u pane, a bucata, travagliava in i campi, racuglia è vendia i so prudutti. Ghjè à stu mumentu quì chì mi dumandai cume e relazione trà a ghjente eranu diventate cusì strane. Mi pare chì oghje a ghjente ùn hè più cusì sincera chè tandu, a cumunicazione ùn si face più di listessa manera chì ognunu stà in casa soia. Eri, a dumenica era u ghjornu di u signore, oghje ùn ci hè più nimu in chjesa, à chì ghjoca à pallò, à chì và à vede i cavalli… Dice un pruverbiu « u passatu ùn si pò cambià », in stu latu quì, tantu megliu ! Sò i sbagli d’eri chì ci amparanu a vita, tocca à noi à fà chì dumane sia megliu chè eri.