Altu - in su troppu romùriu
e in su troppu silenziu - amori,
cun is passirilantis de sa luxi
su coru s’inarcat in is celus.
Non sighit ateru bòlidu che unu sentìdu
lèbiu, fuìu chini scit a cantu tramperìas
i a cali temporadas, fini
arrastu di alas in su mori. Hapu
circau sa luxi e bollu vetti a tui,
doppiu naviu de carrigu. Nisciun’atera
tenit stiva aici prena : totu su prantu
e s’arrisu, su pagu gosu e sa pena.
Tui ses che cammellu sidìu
de un’oghiada, lambriga nùa chesciàda,

a pustis est arribada sa morti
a s’edadi mia toccat a essi sempri prontus
i’ nais tendint a terra grais
stibbadas in sa distanzia de casi unu silenziu
ma est aintru chi murmuttat sa cuscienzia
de s’acabu - diaderus non seus mai prontus
in totu - sa vida stremèssiri comenti aintr’e una rezza
si trobeddat in dd’unu nienti su cabudu estremu
su suìdu, est aici chi s’intrat in sa storia
ripitiri a boxi arta is urtimus fueddus de su liburu
sa pregadorìa chi segundu is intenzionis
depit lompiri a su scopu umili e schetta

Aìani l’odori di lu fenu
li to’ capiddhi di culòl di pani
undi cuàa la cara a contraentu
cun técu a la spusédda in briccichetta
(la Combet di babbu ) in bolu ‘n bolu
pa cadé’ in un oldini di ‘igna
pienu d’alba e di frondi, primma lettu
di cruda ciuintùra.
La bibbènna
cumprìta séra séra ti lacàa
un ammentu di risa illi cantegghj
aumbrati di pampani e un saori
illi labbri di mustu, puppioni
furat’a l’abbi primma di la notti.

Cun folza di mare
mi ni pési
come alba marina
strappendimi radici
ghjà da troppu
tempu liati a inutili ricréi.
Più allonga, sempri
più allonga,
in viagghju, unda pa unda,
a alti paradisi di spiagghj,
mandatagghju a innommu di lu ‘entu,
sempri prontu
a turrà a paltì,
felmu solu un mumentu
chi possin’atticchì
li radici e li frondi turrà veldi.

Su Mare e su Bentu
ghettan funes inoghe
in custa peitta de logu
abetuada
a s’andalitorra de sos sentidos.
Su Bentu muilat
pitigat e ispinghet
a buleu.
Sas undas ispuman
peraulas in s’arenarza.
Bentu
subr’a nois, iscappadu
comente sos caddittos de sa Giara.
Mare
orizadu a imbenas
comente sa bestimenta noa
de sa prima Comunione.

Cunza a su coro
sas bertigas abbosas, eternas
sas gangulas finamentra pasadas
e torra
peri sas cuccas, barica
carrelas de ‘scaccu
‘ue fines sos coros s’istan
a pes de s’omine !
Ogni frina t’est una ‘oghe :
s’istrippidu presu de su caddu
su passu bàdalu de su ‘ezzu
liadu a s’umbra de sas domos
inghiriadas dae porrales de sole.
E duncas, banduleri
in s’umbra tua matessi
palpuzas chesuras brujadas, cuadas
in chejas de marmaru
chirchende cussos comente a tie
lughentes de brunzu in su sinu.