Acqua
L'acqua,
Sò l'acqua ch'omu ùn vede,
Sò l'acqua ch'ella si beie a crepa di a terra cum’e u ciucciu chì s'allatta in pettu à a mamma. Sò l'acqua chì face ingrandà è fiurisce.
Sò l'acqua di a fruntiera turchina, sò l'acqua di stu mare. Sò quellu Mediterraniu. Sò l'acqua di u litu chì ti face isulanu.
Sò l'acqua di sti lochi di memoria, quella chì fala da sti paisoli appesi à e cime. Sò l'acqua di ste muntagne chì si face a so impiaghjera.
