Alba

Deve digià spuntà l’alba à l’infora,
m’ai dettu, è u mondu sanu nascì
da u ragiu di luce di a finestra.
Micca luntanu, sbiancavanu e strade,
facianu curve, cullavanu
è falavanu, incerte è più reali
chè u buschettu chì l’inturniava. Da a terra
s’alzava una nebbia chì diventava
tralucente è lasciava ch’è no vidissimu
e fantasime di i pini. I campanili,
i muri di e case, e bocche,
l’affannu di mille ocelli,
tuttu tornava à assestà si nantu à u viotu,
nascia senza sforzu
da stu zuccheru filatu di luce
di l’alba ch’è tù mi dicia. U to corpu
è u to core è e to parulle
mi ligavanu à u mondu.