Formentera, a surelluccia di Ibiza (77 Km²), hè un isula piana, cù a so punta strema à l’este, la Mola, alta 200 m sopra u restu. Hè una sola cumuna, cù u centru in Sant Francesc-Xavier è dui altri paisoli in Sant Ferran è à u Pilar de la Mola. A ricchezza tradiziunale di l’isula, fora di a pesca è u travagliu di a terra, hè in e saline, chì occupanu 25 ettare, ma oghje Formentera, cù una pupulazione stabile di 3000 abitanti, campa cù u turisimu, cum’è tutte e Baleare. È puru hà tenutu à bastanza cuscenza da ùn accettà l’urbanizazione di tuttu u liturale, chì hè mantenutu pè u più in u so statu naturale, è cunserva una bellezza oramai difficiule da truvà si in Ibiza.

I primi anni di u 1970 Formentera hè turnata u paradisu di i “hippies”, quelli non cunfurmisti chì fughjianu a sucetà capitalista è predicavanu di fà l’amore, micca a guerra. Hè stata a cunsecrazione di l’isula cum’è fine di ognunu chì circava u riposu è a pace