Vis cosmica

A bolta bolta so Giudeu
Giudeu de s'Esodu e Giudeu de sa Torrada
M'hant fattu sapiente in sas Americas
So buttegheri giudeu in su ventesimu circundariu de Parigi
Sas ungias mias sunt restadas in sos muros biancos de calchina
E su sambene de sas manos mias
So unu Giudeu biu e testimonzu innantis a sa terra 'e s'omine
Sa razza mia est apparfida cand'est naschidu su mundu e in sa fiamarida de su fratempus

M'hant giamadu como Deus como cane
Como Omine
Ma su pettus meu est unu tabernaculu fidele ch'arribat unu sonniu bezzu

Unu sonniu antigu de sos mios
De sos ateros Giudeos

Medas ateras boltas so africanu
So s'Africanu pius nieddu de s'Africa niedda
So s'Africanu chi cantat a boghe manna in sos campos de su Mississipi
So cussu pastore vagabundu prontu dae sempre pro abbojare mundos
So cussu de sas siccagnas e cussu de sas tempestas
So cussu de sas forestas
So eo s'esiliadu antigu s'inchizadu de chentu biddas
Su bentu malu m'hat ispartu.

Africa marma de sos omines sa fune de sos seculos m'attrozzat e m'imboligat
E m'indisto mudu comente su tempus in sas carrelas d'Aubervilliers
Imboligadu in unu manteddone cun s'iscoba mia in manu
Eo so s'africanu
Eo so s'Arabu in domo de sa Renault chi una die s'nde tòrrada
E accòmi in custu cuzolu de sole bezzu
Meraviza e morta fortuna
Eo so s'Arabu chi s'nd'istat sezzidu in s'oru 'e sos confines illusorios
E accò in a mie foscigadas e nodosas sas milli passenzias de s'olia arraighinada
Dissippadu andende andende su tempus de sas festas mias inghirlandadas...
In sas cosas continuadas
Sa morte sègada a ferru dulche
Affacca a nois sos Arabos
Ma nisciuna morte succurrevole
Podet abbattire umpare sas concas mias
Sa cundenna manna est d'essere biu
In tottu sos omines

Forzis su tempus...