Versione :
Corsu

Paulu Michele FILIPPI (1)

Paulu Michele FILIPPI hà publicatu una racolta di puesie chì hè un giuvellu di spiritu, di cultura, di ghjudiziu è di riflessione di pettu à a vita. Oramai l’autore u cunniscimu! Hè di quelli chì ùn si facenu micca vede. È chì ùn si montanu a seca!
È à quessi, persone prufonde, astute è discrete, spessu li passemu à cantu –è certe volte l’intuppemu ancu!- senza mancu accorghje ci ch’è no avemu mancatu l’occasione di amparà qualcosa in più
Unepochi puemi messi quì sottu, speremu ch’elli vi impunteranu à piglià isse Poesie particulare (ALBIANA-CCU, 2014) è gode vi le tutte tutte, in a so diversità di estru è di scrittura.
A ragiunata ch’ellu ci hà rigalatu u pueta viderete quant’ella hè ghjuvativa è diviziosa, di piacè è di amparera.

 

FILIPPI ci dice in duie parolle u so percorsu d’insignante à l’università, e so opere in linguistica, a so primura pè a literatura corsa è u studiu di tesa ch’ellu hà purtatu nantu à u FRC (francese regiunale di Corsica): un studiu cumplettu chì d’altronde ùn hè statu trapassatu nantu à un fenomenu di mischju trà corsu è francese chì spessu hè accustatu da un puntu di vista ridiculu, ma ch’ellu hè statu solu ellu à analizà in modu prufondu in ciò ch’ellu dice di l’identità di i Corsi d’oghje.
Volta dinù nantu à i risultatu di u so studiu di DEA: Angelo Rinaldi ou une stratégie de l’ambiguïté, è ci ampara à sapè distingue trà e dichjarazione di l’omu –in particulare in quantu à u cusidettu “dialettu corsu”- è l’universu rumanzescu ch’ellu custruisce.

Ammenta dinù a fizzione di Un persu in Alisgiani duv’ellu messe in scena una storia duve, sottu scusa di un edizione di rubayat persani cunservati solu in , u pueta –Filippi!- scrisse puemetti maravigliosi di erdudizione è di dilicatezza.