Ragiunata
A fiera di a Santa

Francesca : - L'ottu di settembre. Hè festa in ogni locu in Corsica.
Ghjuvan Paulu : - Hè nurmale, a festa di a Madonna ci riguarda à tutti.
Lucia : - Iè, ma i Corsi ùn sò tantu bighini. A dumenica à a messa ùn ci hè tanta ghjente.
Ghjuvan Paulu : - Ùn vole dì nunda. A fede è a chjesa sò dui affari propiu differenti.
Ziu Simone : - Quessa, ùn hè micca stata solu in Corsica. A crisa di a pratica religiosa hà tuccatu l'Europa sana.
Ghjuvan Paulu : - Và cù u livellu di vita. Più si hà solli è menu si crede.
Lucia : - Ùn pensu micca cusì : A` a Santa, ci hè sempre statu a cerimonia religiosa è po a fiera.
Francesca : - Iè, babbone hà sempre vindutu è cumpratu. Era traculinu.
Ghjuvanni : - E fiere sò sempre state stonde impurtante pè a vita di e nostre pieve.
Ghjuvan Paulu : - È puru tanti anni fà sò cambiate assai, e fiere.
Vincenzu Mariotti : - Un ghjornu sò affaccati i marcanti furesteri. Sò ghjunti à vende a so paccuttiglia...
Ziu Simone : - Furesteri è ancu corsi ! Andate chì u prufittu ùn hà mai avutu patria...
Lucia : - Nè patria nè cridenza. Ancu di grazia ci hè un sforzu generale...
Petru Maria : - Iè, prudotti, roba è cultura nustrale. Cose più vere, più sputiche !
Lucia : - A ghjente ùn ci si sbaglia. A moda di e fiere hè ripigliata.
Petru Maria : - Ùn hè micca una moda, ma un bisognu. A prova si ne hè chì tutte e pieve anu fattu a so fiera, oramai.
Ziu Simone : - Iè, ma a più pudente ferma quella di Niolu. A Santa.
Vincenzu Mariotti : - Eiu, l'aghju pruvate tutte. In Casamacciuli hè a più bella.
Ziu Simone : - È po, ùn avete vistu u più bellu. A granitula...
Vincenzu Mariotti : - Una volta, l'aghju fatta ancu eiu, ma mi aghju lasciatu subitu ! Mi gira u capu !
Petru Maria : - Eranu troppu vicine e baracche !