Cantanu. Unu, li piglia a risa...

Ma cosa ai torna ? O canti falzu o ridi !

Scusate, ma mi scappa.

Ti poi ritene, nò ?

Vai è para la tù quand’ella ti scappa a risa scema...

Allora cosa ai à ride ?

Ghjè a merressa.

Torna ? U prete l’avia cù a sora è tù l’ai cù a merressa.

Perchè ti face ride a merressa ?

Perchè ghjè mitomana.

Avà ! Hè merressa !

È bè, hè merressa mitomana...

È cumu a sai ?

Era à a scola cun mamma v’aghju dettu.

È bè ?

Ùn conta chè bugie.

Mammata ?

Innò ! A merressa.

Vedi quand’ella telefuneghja è bè spessu ùn ci hè nisunu. Face finta di telefunà.

Basteria !

Ti la dicu ! Vedi, face crede ch’ella hà travagliatu in America, in China... è bè u più luntanu ch’ella viaghjatu hè Ghisonnaccia per fà e vindemie cun mamma.

Avà tù ci monti a sega !

Innò ! Dice ch’ella hè stata directrice ? È bè, a s’inventa...

O ! Avemu elettu merressa di u paese un campu di scope !

Perchè di scope ?

Ùn si dice bugiardu cum’è a scopa !

Ma vai o macagnò ! È tù cumu sai ch’ùn era micca direttrice ?

Perchè era una sumerona à a scola ! Ùn hà mancu chjappu u so certificatu...

È cumu a sai quessa ?

Perchè era cù a so mamma ! Duie sumerone inseme ! Ha ha ha !

Ridi ridi ma hè vera ! Eranu sempre in vogula, ùn pensavanu chè à ghjucà.

Avà chì ci pensu... Babbu l’hà cunnisciuta quand’ella avia 16 anni...

Quand’ella hà fattu u so discu ?

Iè. Ma quella di u discu dicia babbu chì era una fuchjichja.

Basteria !

Iè hà fattu crede ch’ella avia fattu un discu !

L’aghju intesu, eiu !

Tuttu u paese l’hà intesu. Ma babbu m’hà dettu ch’ella avia pigliatu un « 45 tours » d’una vechja cantatrice...

Dalida ?

Iè Dalida, mi pare... Nò, più vechja...

Allora hè Gattaceca.

Voilà, Gattaceca ! È bè hà pigliatu un discu di Gattaceca, hà grattatu u nome di Gattaceca è hà scrittu u soiu !

È nimu si n’hè avvistu ?

Tutti si ne sò avvisti, ma nimu hà dettu nunda...

È perchè ?

Perchè, u primu o a prima chì a chjamava bugiardu u si pigliava à capate !

Allora, quella di u telefericu di u San Petrone ?...

Fole dopu cena !

Citroën in Pekin ?

Fola fuletta !

Vedi avà vò è viderete ciò ch’o facciu eiu... (Face per sorte)

Guarda chì ti piglia à capate in bocca !

È bè ci femu un’antra canzona è dopu ci vò...

Serà megliu cusì...

Ripiglianu à cantà.