Cù Alain GERMAIN è Michel TANNER, Dominique BOISSEL hà participatu à TURCHINU MAIÒ di nuvembre scorsu, à parlà ci di u teatru. Prufessore in Nanterre, travaglia à u Théâtre de la Tempête. Dominique BOISSEL intervene à parlà di l’attore, a definizione di u so travagliu, u so esse prufondu, adimensione antrupulogica di a so spressione.
      In un discorsu diviziosu, prufondu è cuncretu passa in rivista e varie quistione, teoriche è dinù cuncrete, chì riguardanu l’attività è a funzione di l’attore. A riflessione hè arrimbata nantu à u pensà è e defiunizione di Stanivlaski è di Jouvet pè u più. I raporti trà u sentimentu, l’emuzione è u ghjocu sò quelli chì strutturanu a parte più maiò di issa interrugazione.
       A so intervenzione ch’è no presentemu quì in quattru tempi hè articulata nantu à duie quistione maiò :
1-L’attore : ciò ch’ellu ùn hè
2-L’attore : ciò ch’ellu hè :
        Ammenta à principiu a cundizione suciale di l’attore seculi passati è rimarca ch’ellu ferma qualcosa oghje di l’ignuminia, a messa da cantu in a sucetà ch’ellu patia tandu. Da appughjà issa affirmazione cita parechje riferenze ( Mauriac, Kantor, Genêt). In cunclusione d’issa prima lampata custateghja ch’ellu ùn hè tantu cunnisciutu, in fatti, ciò ch’ellu hè l’attore, fora di a definizione tecnica. Hè perciò ch’ellu si primureghja di a dimensione antrupulogica di u teatru.