A te o Austi - Francescu Luciani

À tè o Austì

 

Mentre chì lu tempu corre

Cert'anime sintinelle

Veghjanu cum'è le torre

Di u Falcone è e Caselle

È nùn ponu mai more

In celu mez'à le stelle

 

Dicenu chì à l'altru mondu

La vita mai nùn pianta

In un riposu prufondu

Tuttu lu ghjornu si canta

Ch'ella sia in stu circondu

Quessa la to Pace Santa

 

Si sà chì ogni cristianu

Nasce cù lu so destinu

Serà statu u più supranu

Chì t'hà apertu caminu

È t'hà chjappu per la manu

Perchè tù li stia vicinu

 

A stagione veraninca

T'apre u so chjassu fiuritu

In la sarra alisgianinca

À gode per l'infinitu

Ciò ch'un pueta di trinca

Chjama tempu preferitu

 

Fà ch'era l'ora di parte

À fà l'ultimu licenziu

U versu di la to arte

Ùn cunniscerà silenziu

Chì u puderai sparte

Cun quelli partuti innenzu

 

Oghje si chjode un libru

Testimone di talente

Da la fine à u principiu

Ci rimanu stonde è ghjente

Chì di quessu lu calibru

Pocu si ne puderà sente

 

E pagine gireranu

Cum'è scorrenu li ghjorni

Da l'inguernu à lu veranu

Canterai in sti cuntorni

Da ùn sente ti luntanu

Amicu ben ch'è t'ùn torni

 

In l'assenza ch'è tù spanni

I ricordi stanu incesi

È ralegranu l'affanni

D'Alisgiani è i so paesi

Quandu à u filu di l'anni

Cantanu sempre i to mesi

 

Ùn serà più cum'è prima

Quessa hè bella chè capita

Ma quand'un pueta stima

Chì a so strada hè finita

Hè forse per fà a rima

Di a morte cù la vita

 

Tù ùn appia nund'à teme

Di paradisu o d'infernu

S'è à Diu oghje impreme

Di pigliatti hè forse cennu

Di fà rimà sempr'inseme

A puesia è l'eternu

 

Riposa in Santa Pace

O Austì, duv'è tù vai

Di pett'à ciò ch'ella face

A morte cù li so guai

A to musa ùn si pò tace

Ch'un pueta ùn more mai

 

Francescu Luciani