Eccu a cullezzione di a nostra rivista. Sfuglittendu la, truverete assai robba. In più di u piacè di e letture, à chì vole pò ciuttà ind’è l’imaginariu literariu di l’animatori di a rivista, dunque di una parte di a generazione chì si hè primurata di creazione in lingua corsa. Da pochi anni u versu hè più tematicu, puru s’elle si trovanu sempre e varie rubriche.
Bonanova hè stampata nantu à carta una volta à l’annu (numeru doppiu). Ogni volta hè l’occasione di apre una galleria di l’opere di un plasticistu.
A cullezzione sarà messa sana sana in ligna in i mesi chì venenu. Per stu pocu si pò sfuglittà qualchì pagina.

Golu

Golu mi cola in gola
O fiume di tanti anni
Pruni di una curona
Ch’è tu lampi à lu ponte

Eranu anime fiere
Pocu impreme l’armata
A banda o a ruchjata
Inchjuccate à luttà

Eranu anime meie
Pocu impreme lu sangue
A sterpa o u razzinu
Inchjuccate à firmà

Eranu anime lebie
Sopra à a sciuma di l’onda
U tagliu di a vita
E vulia annigà

U ponte s’hè falatu
Ma ferma fonte fida
Al di là di u tempu
Zirlata à meza mente

Golu mi cola in pettu
O ghjargalu di brame
Fiori di una cullana
Ch’è tù appendi à lu ponte