A passione

         Sugettu à pena scemu, hè vera… Ma eccu quantunque… Hè una prova di spressione, ùn hè vera ? Allora eccu! Valerà ciò ch’ella valerà...
Una cosa cusì, cumu si pò definisce? Veramente, à ì la franca... nù a sò. Bona! Avemu da pone la in un altru modu issa quistione custì.  Di cosa si pò esse passiunatu è cumu hè?
Pruvaraghju à risponde cun parechji esempii.

        Tè, si pò esse appassiunatu di ... libri. Di rumanzi tamanti induve ogni parolla ci trasporta è ci accumpagna luntanu luntanu, in un altru mondu chì custì ùn esiste più chè frase magnifiche è incruciate liriche chì ci facenu scopre paesaghji di bellezze è dinù campà aventure strasurdinarie sequitendu persunagi atipichi...

       Si pò esse appassiunatu di ...musica. O di cantu. Quandu ogni nota piglia à l’insù cù una purezza è una ghjustezza chì ci paria ch’ella ùn pudessi esiste altrò, quandu strumenti è voce s’accordanu è sonanu in armunia, fendu ci scopre torna altri soni ch’ùn si sentenu chèdi a punta di l’arechja, quandu l’archettu si strupizza à nant’à e corde è chì e dite correnu nantu à u strumentu cum’è cavalli per piaghje è monti, quandu u soffiu colla da u corpu sanu, si rinforza in u pettu è dà nascita, à livellu di a gola, à una spressione di sentimi puru è sinceri chì contanu una storia vera... Per quellu chì crea è sà ghjustu ascultà, hè un mumentu chì ùn si pò discrive...

         A passione si pò avè dinù pè... una terra.  A nostra terra mamma, Cursichella cara è i so lochi di bellezze salvatiche, pura è dura à tempu. Quandu si apre à u balcone di a stanzadi a casa in paese, di matinata, è ch’ellu si scopre torna è torna u listessu paisagiu di muntagne cuperte di machja fiurita o secca è li vechji castagni, ch’ellu si vede l’altri paesi di a pieve da luntanu, ch’ellu si gira u capu è si scopre dinù e casucce secularein giru à a vechja chjesa, è tuttu què cun listessu frizzore in core è in a persona sana, ghjè amore è passione à tempu  pè a terra di i so antenati.

         È à prupositu di l’amore... Iè ci vole à parlà ne. A passione amurosa. A più ricercata, è da luntanu. Ma cosa hè? Ghjè quandu si hà l’impressione di avè truvatu l’Altru? Quandu ellu si scopre a forma di a so persona ind’è a notte o in una mansa di ghjente? Quandu ùn si sente più solu? Quandu ghjustu à puntu, si vede issa listessa passione in u so core è in li so chji? Chì sarà a sfarenza trà amore è passione? Si pò stacà unu è l’altra? Risposte per ste dumande ùn ne aghju è mi dumandu s’è quelli chìtuttu què l’anu vissutu, s’elli l’anu dinù? Orse ùn sarà micca tantu impurtante.
Allora à traversu tutti iss’esempii pruveremu à dì a passione ciò ch’ella hè, a vera? Hè ciò chì ci face sunnià o chì ci rende felice? Hè amore o ùn hè micca amore? Sarà solu una cosa bè?

          Ancu cusì hè difficiule à spiecà. A passione sarà forse un secretu. Un secretu di l’anima. , qualcosa ch’ùn si pòchè risente, senza ricunnosce la di sicuru...