Corti è a giuventù

I più belli mumenti..... di Stefania

 

In ste poche linee aghju sceltu di parlà vi di a cità di Corti è sopratuttu di l’evuluzione di i mio sintimi nanzu di ghjunghje in facultà è oghje ch’e sò studiente è ch’e campu quì. In u primu tempu, nanzu d’avè u mo baccu, Corti era per mè a cità di u piacè, di l’asgiu è di l’oziu, dopu à u liceu è a vita una cria troppu sottu surveglianza famigliale. Gode si un pocu di libertà ùn sarebbe cusì male, malgradu tutta l’affezzione ch’omu hà pè i parenti. Fà cunniscenze nove, cambià vita, per dì cusì, era una cosa chì mi attirava…

Tandu, u mio pinseru era prima di avè issu beatu baccu pè pudè cullà quassù, in issu locu simbulu di... libertà! . È fà e mo surtitelle tutti i marti è i ghjovi ; à e serate studiente… Issa aventura mi mettia in suchju ma cù u tempu mi sò arvista chì in più d’esse palpitante era soprattuttu una sperienza ricca chì ùn si pò pensà. I mio principii in sta cità annunciavanu dinò l’iniziu di una vita nova fatta d’indipendenza. Eiu chì sò zitella sola, in casa possu dì chì a mo mamma mi face tuttu. Invece quì sò stata obligata à sbruglià mi per fà mi da manghjà tutti i ghjorni, pè lavà i mio panni, pè addivuglià.

Ma possu dì chì u piace era grande perch’e aghju pigliatu cuscenza di u fattu ch’era ingrandata è chì avà mi tuccava à sbruglià mi sola, senza i mo parenti à aiutà mi.

Ghjè piuttostu st’aspettu di a cosa chì mi piacia u più perchè, ancu s’e i tengu cari, quande t’ai 18 anni, u fattu d’esse independente è di sente si sempre dì « fà què » « fà lu cusì » diventa difficiule à accettà. Ma sta cità hè soprattuttu u centru di i scontri, di e cunniscenze postu chì a facultà di Corti hè a sola di Corsica, è ch’elli ci sò i studienti di tutta l’isula chì collanu à studià quì. S’incontra assai ghjente d’altre regione.

Si ponu incuntrà à a facultà o ancu ind’una serrata. “Les Années Fac » cum’ellu si dice in francese sò à spessu i più belli mumenti di a nostra scularità, è sò mumenti unichi induve stu mischiu di tanti affari novi, tante scuperte ci danu un sintimu specificu chì mai più ùn si risenterà. Sò l’ultimi anni di trascuraghjine, nanzu d’entre ind’a vita attiva è di scuntrà i pinseri ch’elli scontranu l’adulti ogni ghjornu. Ghjè per quessa ch’ellu ci vole à prufittà di sti mumenti chì firmeranu pè sempre ind’a nostra mente.

Allora Corti? Un locu schiettu sì, fidu è fermu. È à tempu cumplessu cum’ella hè a vita...