“Amerindianu” di Diana di l'Alba

“Amerindianu” di Diana di l'Alba
 
Quand'ellu si parla di i grandi testi di a canzona corsa, quelli ch'anu portatu una generazione o quelli ch'anu avutu u successu à un mumentu datu, si face riferenza aspessu à Ghjacumu Thiers, Ghjacumu Fusina, i fratelli Vincenti, Ghjuvan Paulu Poletti, Ghjuvan Terramu Rocchi...
À mezu à sti tenori di a poesia cantata, affacca qualchì volta u nome d'un anonimu.
Ghjè u casu per a canzona Amerindianu di Diana di l'Alba.
Si trova in u discu " Da musica la vita ", esciutu in u 2008.
U titulu hà avutu u bellu successu.
 
I giovani si campanu à cantà lu in e serate.
A musica hè d'Antone Marielli, u cantatore è capimachja di Diana di l'Alba, ma u testu di sta canzona hè d'una persona incunnusciuta : Simona Alessandri.
Insegnante in a scola primaria René Subissi in Bastia, Simona scontra à Antone Marielli in 2007.
Antone canta ma ghjè dinò professore in lingua è cultura corsa in Bastia.
À st'epoca hà creatu una scola di cantu di donne in Furiani.
Simona Alessandri ci participeghja.
Ella hà digià scrittu canzone zitelline per i so elevi.
Tandu Antone Marielli li dumanda incù malizia di scrive li un testu.
Invece d'avvergugnà si, Simona li propone un'opera ch'ella hà scritta.
U so titulu, Amerindianu piace à A. Marielli.
Cumpone subbitu subbitu una bella musica chì mette u testu in valore.
Simona avia scrittu i filari di a canzona dopu una discursata cù un amicu passiunatu da i populi indiani di l'America.
St'amicu era persuasu d'esse una rincarnazione d'un indianu, cum'è Jim Morrison di quale ellu era scemu.
Valori, una spiritualità forte, una storia, c'era di chè cummove l'autore chì scrivia nant'à un tema universale.
Ghjè a storia d'individii, d'una tribù, d'un populu multipulu, à u cotidianu difficile ma à a dignità chì nimu ùn pò cambià.
In una lutta continua per a so vita, prima, durante è dopu a so esterminazione da i Stati Uniti, chì cunstruiscenu a so nazione nant'à u primu genocidiu di a storia moderna.
In qualchì filari, Simona Alessandri ci face vede a vita di sti populi, portati da l'elementi è e stagione chì anu sempre guidadu i so spiazzamenti.
Sta natura sempre prisente induv’elli campanu in felicità cù i so dei, fendu ci ancu e so cunversazione.
Un fattu spirituale cumandatu da u « Spiritu Maiò »prisente à vicinu à i più curagiosi è soprattuttu à quelli chi sanu ascoltà.
In giru à un focu, a sera, l'anime s'uniscenu in un cantu chì colla "sin'à e stelle."
Stu populu ghjè assai vicinu incù a cultura corsa tradiziunale, sensibile cum'è i Corsi à i simbuli, à e forze di i spiriti. Anu dinò in cumunu una cultura in periculu.
 
Ci hè in sta canzona una scrittura universale è ci ritrovemu tutti in ella.
A cerca cumuna, trà i corsi è l’Indiani, hè quella di i valori anziani persi.
 
Cathy CAMPANA