In a so ragiunata cun noi, Alanu DI MEGLIO hè primurosu di ùn lacà da cantu nisun fattu, nisun locu ch'ellu pensa fundatore di qual'ellu hè in puesia, ma puru in a so persunalità. Ci porta da Marseglia, à Bunifaziu è a Corsica sana, è po entrimu in u so Lochi Mondu. Una creazione è po un cuncettu.

Ghjacumu FUSINA volta nantu à un itinerariu riccu di furmazione è di spressione varie.

Patrizia GATTACECA ci dà un parè persunale è chì rinchere! Di fatti issa militante talentusa assai, decisa, attiva è attaccata assai à a vita di a lingua ci porta una bella testimunianza fendu vede cum'ellu campa u corsu in a so vita di tutti i ghjorni, è moltu più ch'ella ne face un usu artisticu è pueticu prufondu è veru. In e so risposte, si sente ad ogni mumentu, ad ogni parolla quant'ella hè di primura in a so vita a lingua corsa.