Intervista a su collettivu Arbeschida Sarda “Disterradu sardos contra su colonialismu”

Posted by Zirichiltaggia on 12:58 //

Acabbadas sas intervistas a sos sòtzios indipendentistas de sas Universidades Sardas amus detzisu de dare una mirada a s'emigratzione de sos istudiantes sardos pro cumprender ite nde pensant de sas chistiones polìticas e culturales de sos ùrtimos tempos chi, est siguru, no ant lassadu indiferente calesisiat sòtziu universitàriu, màssimu sos chi s'agatant fora de Sardinna. Amus detzisu de fagher carchi pregunta a Arbèschida, unu de sos sòtzios prus ativos - non petzi, cheret naradu, de su fruntene universitàriu, chi amus a bider como - de s'emigratzione sarda, chi aunit medas esperientzìas ispartas in totu s'Itàlia. Nos at torradu imposta Giuanne Ledda, bortigalesu de 31 annos, laureadu in ingegnerìa informàtica in Pisa e impiegadu in un'impresa pisana chi produit programmas pro internet.

 

Arbeschida Sarda naschet in su 2009 dae una sintesi de s’esperientzia de “Sos tzirculos contra su G8” de su 2007, annu in su cale si previdiat s’acumprimentu de s’atobiu internatzionale in Sardigna, in s’isula de sa Maddalena.
In su “manifesto” bostru, faeddaes de comente su processu de omologazione culturale e linguisticu at reduidu, cun su colare e su tempus, a unu fenomenu folkloristicu e a sa conditzione de ispassiu pro sos turistas meda de sas manifestatziones caratteristicas de s’istoria e de sa cultura nostra. A supra de custu, est mudada carchi cosa dae su 2007? Cal’est, pro bois, su rolu de sos emigrados sardos pro defendere, avalorare e mantenner bia, pro ti narrer, sa limba sarda?
In custos urtimos annos amos bidu progressos mannos in contu de su movimentu linguisticu intreu. Sos partidos e sos movimentos indipendentistas e soberanistas ant cuminzadu a leàre in cunsideru seriu sas politicas linguisticas in sos programmas e in sos atos uffitziales; sos intelletuales sardos ant immannidu chircas, pubblicatziones e produtziones, dande vida a unu dibattitu mannu (chi at postu in mesu finas gente esterna a su movimentu) subr’a a s’importantzia politica de tenner una Limba Uffitziale chi siet limba natzionale pro totus sos sardos.
Semus ancora atesu dae su c’ant balanzadu cun sas gherras pro sa Limba, pro esempiu, sos cumpanzos de Catalunnya o de Euskadi, ma est giustu puru chi bi sient modellos de sighire e “a bellu a bellu” sos signales sunt arrivande: bastat de bier su bellu tribagliu chi sunt faghinde in Thatari sos giovanos de “Su Majolu”.
Nois de Arbeschida semus cunvintos chi sa chistione de sa Limba depat tenner massima prioridade in d’una gherra de liberatzione natzionale comente cussa sarda. In custu sensu, dae pagu tempus a custa banda, chircamos de nos mover cun atos praticos: sunt in Sardu totu sas comunicatziones uffitziale riferidas in carchi modu a sa Sardigna (comunicados, articulos, cummentos a carchi fatu de cronaca, bolanteddos, manifestos, etc.), sunt in Sardu totu sas comunicatziones “internas” de su sotziu (mailing list), chircamos de faeddare e fagher faeddare in Sardu in sas iniziativas inue ischimos chi su publicu est fatu solu dae sardos.
Chircamos de fagher su massimu isfortzu pro impreare su sardu fintzas essende chie de un’ala de si’Isula e chie de s’atera. Est unu tribagliu chi, pensamos, si non cuminzat dae sos militantes de s’area anticolonialista, tando sa gherra nostra la podimos decrarare morta prima de cumintzare.

Cales sunt sas printzipales initziativas chi Arbeschida Sarda at organizadu pro abbarrare ligados cun sa Sardigna e sa cultura sua?
Faeddare de curtura in Sardigna nos est simple. Ca in sos urtimos tempos si sunt colados pro curtura sarda bascaramenes chi no sunt mancu folklore, ma istrochidura de cussu chi sos istranzos cherent bier de sos sardos.
Pro custu amos organizadu s’annu coladu un’atopu interessante meda dae su titulu “folklorizatzione e deculturatzione coloniale in Sardigna” inue Prof. Bustianu Pilosu (sotziu “Tenores Sardigna”) e prof. Antoni Buluggiu (rivista “Camineras”) ant ispiegadu a una platea ricca meda it’est Curtura Sarda e it’est Folkorizatzione, e cales sunt bistados sos efetos antropologicos e sotziales de su colonialismu culturale in sa terra. Dae sa die meda zente at cuminzadu a abaidare a sa produzione curturale sarda cun ateros ogros!
Atera opera de salvaguardia de sa curtura Sarda chi b’andamos fieros est su recuperu de s’opera teatrale “Pedru Zara” de Lenardu Sole, chi semus resessidos a torrare a sos teatros de s’Isula gratzias a s’azudu fundamentale de sa cumpanzia de teatru sardu “Elighelande” de Iscanu Montiferru. Pedru Zara fit dae sos annos ‘70 chi no beniat posta in atu; dae cando sa cumpanzia teatrale militante “S’Isciareu” (totu gente ligada a Su Populu Sardu) chi l’aiat cummissionada a Sole, si fit isorta. Unu peccadu mannu, dadu chi sos temas, mancari pensados in cussos annos, sunt bivos a dolu mannu fintzas oe: su disterru, su colonialismu industriale, sa gherra pro s’emancipatzione de su Populu.
Gai amos nadu, “cherimos torrare a pesare Pedru Zara dae sa tumba”!
Amos agatadu professionistas serios e capatzes comente sos amigos e sas amigas de Iscanu e in su giru de unu annu, sa “prima” fit cosa fata!
In Pisa innantis (dae innanti a 100 sardos disterrados) e in Nugoro a pustis..cun sa presentzia de Lenardu Sole, chi como at 90 e passa annos. A ratz’e soddisfatzione!

*In sa foto: Giuanne Ledda