Guidu BENIGNI

Lettera à Ghjuvan Petru Ristori
 

Campu vallinu di Pigna,
u 9 di ghjugnu 2012.


Ti salutu caru amicu pueta,

 

M’ai dumandatu un ghjornu perchè scrivu ? Mi garba cusì è a li provu cum’ella mi vene è piace.
Scrive in francese ? Sì, qualchì volta, perchè nò, quandu chì u sugettu li và… ma nunda di sta terra ùn si sprime megliu chè cù u sapore di a so lingua. È quessa hè valevule per tutte e lingue di u mondu.
Ma cume scrive in corsu, mentre chì a moda di l’imaginariu oghjincu hè zuffu di quantità di fiure, di pensate, di valori, d’isse mille cose venute d’altrò ? Cume scrive quandu tutte e circustanze di a vita sò for di i nostri usi è tradizione ? Cume scrive in corsu, quandu a lingua duminatrice à invaditu tuttu u spaziu, tutti l’atti, tutte e pensate, tutte l’anime ?
Ma cume scrive in corsu sottumessu ? chì scrive ? per quale ? perchè ? Quandu omu porta in sè un vissutu oramai spentu. Quandu s’hà cunnisciutu isse vechje barbe, issi maravigliosi stalvatoghji à mezu à u fume agru di l’erba tavacca, à scornu di fucone d’invernu o sottu pergula d’estate tante è tante fole, raconti, venture è intesu canti impruvisati chì facianu partita di a vita d’ogni ghjornu è chì oghje ùn sò più chè lotta per u so mantenimentu cù u timore di vede le sparrisce.
Adunque ? Scrive isse brusgiature di l’anima, scrive u malesse, a malincunia ? È tandu fassi trattà di passeistu ? Trà issu spaziu, d’eri è d’oghje, vale à circà una luce… intravede a bona strada. È rivene, pur ch’ella sia pussibbile, à una scritura libera.
Chì vole dì scrive liberu ? Esse in accordu cù "eri", o cù "oghje" ? À sente à certi media, televisione, riviste o ghjurnali, di quì o d’altrò parlà di a Corsica ùn si sente chè "paradis de vacances", o invece "enfer terroriste". À quale è chì crede ? "Ildebotté" o "Ildemaffià" ?
Chì fà tandu : resiste à a voglia di risponde à l’asini è scrive senza primurà si d’isse minuzie ? Un solu penseru mi preme : chì ne serà dumane di a nostra lingua, di a nostra cultura. Ùn vogliu circà à sapè ciò ch’elli seranu l’evenimenti futuri è i so periculi. Vogliu scrive a mossa attuale, cù a Storia d’eri in memoria è l’orizonte di dumane in vista.
Scrive veru o scrive finzione, in prosa o in puesia, ma scrive ghjustu sempre, è ùn pensà a e disfatte pussibbile, à l’irunie imbecille à e ghjelusie mischine.
Scrive è sunnià. Sprime ciò chì cummove l’anima. Sprime una riflezzione filusofica. Scrive una parolla, un termine, un dettu in prosa o in rima. Ci hè tantu è tantu à dì. Scrive in libertà, ch’ella sia quella interna, o quella esterna. Mi rivene in mente Erri De Luca chì scrivia : "Aghju amparatu chì per scrive ci vole à esse liberu." Ch’ella venga da sè o d’altrò, a scrittura corsa d’oghje deve esse sparta è spartuta, aperta è accugliente, larghera è allargata, fatta per purtà testimunianza d'una lingua è d'una cultura vive à a nostra giuventù avviata verdi dumane, è dì li chì s’ella hè stata, ella hè è serà u verativu ritrattu di u so populu. A giuventù, o amicu, hè per ella ch’aghju piacè di scrive.
Eccu a mio brama di scrittura, o Ghjuvan Pé.
T’abbracciu cun l’amicizia è ti pregu salute,

 

Guidu Benigni.