San Petersburgu hè propiu una cità di sognu. Mi sò firmatu in pienu mezu à u ponte. A cità hè isula, è ùn hè micca metafura di dì la cusì. Sò parechje in issi lochi nordichi duve u delta di a Neva sbocca in u mare di Finlanda. À sente dì sarianu  quarantaduie l’isule è settantacinque i canali è, à l’annuttà, i ponti si alzanu è l’isule voltanu… isule in vera. Dunque ci vole à tene a mente spichita è ùn lascià passà l’ora ghjusta.

Digià ch’o aghju mancatu u spettaculu prugramatu in u Teatru Mariinski. Hè ùn sò quantu tempu ch’o mi ne stò cusì, imbasgialitu davanti à u currente forte è lindu di a Neva…  A sò chì ci vuleria à malfidà si di i fiumi chì correnu : facenu sunnià, facenu pensà. È face un pezzu avà chì mi vene è mi rivene à mente stu filu di sti trenta anni ch’o mi passu in Corti, à l’Università…

I fiumi, avà capiscu cum’hè chì l’Antichi i si rapresentavanu sottu forma di tori, curnuti è furzacuti. A Neva,  ella, si ne fala frumbata sottu acqua ma liscia è linda sopra:  nunda l’hà da pudè parà. A sanu l’acule marine chì ogni tantu ci rimpiananu sopra è si ghjocanu à seguità l’onda, è ogni tantu falanu è si calanu nantu à una d’isse lastre di ghjacciu ch’ella trascina sempre l’onda à st’epica quì. Pè una stonda si lacanu purtà, fine è maestose… È mi ne stò custì, maravigliatu è fermu... In giru à mè u paisaghju si cunfonde in un panorama suttile ; e culonne rustrale stinzanu un lagnu russicciu, impudicu è mutu ver di issu fondu di Golfu di Finlanda, è quallandi, à passà per dì l’altra sponda, a frezza inaurata di San Petru è San Paulu zifra u chjarore vesperale di un celu chì si ammatta. È in core mi colla, forte ma incerta è strana, a voglia sulenne di ringrazià. Ma à quale ?

Hè stata solu una scappatella chì l’appuntamentu di u Premiu « Teatru Europa » ùn ci laca tantu asgiu à fà i turisti. Hè a XIVa edizione quistannu è u prugrama, diviziosu è altissimu cum’è l’altre prima, ci face praticà, in una settimana, e truppe più maiò è e dramaturgie più artiste di u nostru tempu.  Quistannu u scontru hè trà i più famosi da ch’ellu esiste u Premiu è l’Europa ne hà vulsutu fà a so manifestazione più di prestigiu in u campu di l’arte dramatica.

Ci laca pocu tempu pè a visita d’issa cità splendida è cuntrastata, cù u so patrimoniu storicu è u so presente cusì cumpositu, da maraviglià si è da strappà vi u core. Ùn sò s’o teneraghju più à mente i tesori di L’Hermitage o u gestu, derisoriu è pateticu, di e donne vechje è stanche chì frustanu  a so santa ghjurnata à fà l’alza è cala di e tendinette da fà nice di prutege pitture è ogetti d’arte dilicati è antichi, ma cunservati in cundizione à l’anticogna è prive d’efficacità. O e clicche militare chì ripetenu in piazza da a mane à a sera è i giovani suldati chì s’inturcanu straiati sottu à e statule equestre maiò. O i suldati gambimozzi è infermi di tutte e mamme chì ùn a si anu francata di a guerra d’Afghanistan. Cuperti à medaglie è decurazione, porghjenu a manu longu à l’elegante Traversa di A Nevski…

U TEATRU DI L’EUROPA

Face prò di truvà si in a magnifica sala di u L’Academia Teatrale di San Petersburgu. Simu parechje centunaie à aspettà quellu chì hà ricevutu quistannu u Premiu speziale pè a so opera. Ci hè più giovani chè ghjente matura o vechja. Quand’ellu entre Yuri LYUBIMOV, ùn vi dicu l’emuzione. L’omu hà 94 anni, ma un ottimisimu chì li ne scaccia unepochi. Hà da stà trè ore sane à risponde à e dumande di tutti, critichi è spettatori, studianti di arte di u spettaculu è di scenze pulitiche. Ci vole à dì chì pè unu è l’altru duminii l’omu hè un maestru di prima trinca. Regista famosu di u Teatru di A Taganka hà cunnisciutu un successu mundiale cù e so messe in scena maiò, ma ancu l’interdizzione di i so spetaculi, a gloria tamanta in qualsiasi paese è a persecuzione pulitica in a so patria. Hè testimone assai di cum’ella hè l’arte capacità à luttà contru à l’oppressione è, in fin di contu, malgradu tutte e vicende, à purtà verità è pace.  Sarà quessa a primura chì u move è li dà una serenità è un’irunia chì ci laca à tutti stupiti. Di quelli chì ci simu stati issu ghjornu di aprile, ùn ci ne sarà mancu unu à scurdà si ne, cridite la puru. È mi vene cum’è nantu à A Neva, l’idea di ringrazià.  À quale ? À nimu è à tuttu. L’Università è l’azzione culturale ch’ellu mi hè datu di dirige ci da parechji anni. L’altra sera dinù, mi hè venuta issa idea tosta di a ricunniscenza ma indirizzata micca à unu, ma à a nostra situazione. Un fattu di nunda. Un incidente mezu tontu è mezu ridiculu. Eramu una mansa ad assiste à E trè surelle di Ceccov Lev DODIN, chì ebbe u «Teatru Europa » dece anni fà è incanta mezu mondu. Da cum’ellu era pienu, in u Teatru Maly Drama, ùn ci saria entrutu un acu. Da a mo parte ci era un angulu di vista scomudu per via di un’avanzata di u balcone chì piattava una parte di u pannellu duv’elle sfilavanu e trè traduzzione –francese, inglese, talianu-  di u testu recitatu in russiu. Or figurate vi chì da u locu duv’è no eramu pusati eo è una bella parte di i participanti ghjunti da Francia, ùn si vidia nè a traduzzione inglese nè a francese. Solu u talianu. I mo cumpagni anu fattu un scandalu caccendu si la contru à l’urganizatori. Per contu meiu, mi sò statu zittu, cuntentu è un pocu vergugnosu di u nostru privilegiu corsu di capisce u talianu.

Ùn hè mancu à pena a prima volta chì, in a rete di l’Istitutu Internaziunale di Teatru di u Mediterraneu (IITM), u chjucu và di accunsentu è si appaghja cù u maiò. Pè u Premiu « Teatru Europa » tutti l’anni ci truvemu in una cità o l’altra d’issu spaziu mediterraneu spessu spessu ammintatu è cusì pocu cultivatu è praticatu ! Trà l’altri partenariati aperti cù u CCU, sarà segondu mè quellu più fruttiferu ed uriginale. Annu eramu in Wroclaw, dui anni fà in Tessalonica, prima in Turinu, Taormina è altre capitale culturale. Ad ogni volta ci purtemu qualcosa in casa curtinese, da sviluppà dopu cun cunvenzione è prugetti particulari in i varii campi : lingua, literatura, edizione, azzione citadine o educative, chì custindi, in issa rete, l’azzione à prò di l’arte mai mai hè spiccata da a necessità di fà arte umana è aperta à a vita cù i so castighi, i so drami è i so sciali. Trà tante cose almanaccate è sviluppate cun Corti da fuculare di un azzione specifica mi venenu à mente unepoche di realizazione cuncrete, cù issi lumi di gudimenti ch’ella vi dà l’azzione bella, aperta è prufittevule. Da u 1998, parechje edizione di Teatru Universitariu è Sculare, accugliendu rapresentanti è spettaculi di e 25 sezzione di l’IITM è parechji lochi culturali di Corsica ;  Argonauti (2001), un spettaculu multilinguu (20 attori è trà quessi dui di quì), cù una residenza di teatru di più di un mese in Furiani è una turnata di 25 capitale di Europa; « L’Odissea, Battellu di a Pace », una scimità maravigliosa, è chì partì da Corti, Bastia è Marseglia cun capitanu è urganizatore Richard Martin di u Teatru Toursky in Marseglia . Ch’omu pensi chì a cerimonia iniziale fù di disarmà un battellu di guerra è fà ne una nave di pace! Issu miraculu di arte è fratellanza navigò è accustò durante dui mesi ind’è porti chì u so nome hè sinonimu di guerra accanita o di periculu maiò pè i nostri cuetani. È fù festa di arte è speranza in ogni locu. Oghje l’iniziativa hè diventata  Biennale è a prossima hà da navigà pè u Danubiu, à cullà da Costantia à sin’à in Vienna. Issi rughjoni culturali è i so patrimonii, pè un bellu pezzu chjosi à l’occidente,  si sò spanticati pochi anni fà. Ci avemu calatu amicizie è cullaburazione intelettuale tutte di ghjuvore : artisti di Cecchia è Sluvacchia, di Bucaresti o di Tirana accapati cun Curtinesi à l’azzione culturale universitaria. Certe opere di soiu sò publicate in lingua corsa, cum’è per Dražen Katunarić di Zagrebu o Katia Kulavkova di Skopje, mentre chì cun Alfred Bualoti di Tirana preparemu l’adattazione teatrale in corsu di un rumanzu di Kadaré.

In Corti, à u CCU, simu sempre stati bramosi di seguità isse strade è ligà le cù i nostri chjassi  muntagnoli, o cun quelli più tradiziunali cù a Francia o i vicini vicini d’Italia o di u Sudu.

Da Corti ùn si ne hà vista à nantu à u mare, ma ùn mancanu i Mediterranei è micca solu pè issi curridò universitarii. Cun l’azzione cuntinua in issa direzzione, a ci femu  propiu à vede u mare ! À dì la vera, ùn hè tantu difficiule per via chì l’università, l’innalza a muntagna vicina! Ognunu di i gesti culturali ed universitarii fatti in issa direzzione mediterranea sinu ad oghje hà creatu cuntinuità, relazione durevule è barattu strutturale di idee, prugetti è rializazione. Sottu ci sarà un sognu, una voglia, un prugettu à misura di avvene.  A dice Predrag Matvejavić : « u sacrifiziu, l’estasi ùn dipendenu solu di a bellezza o di l’addisperu. Soca ci sarà dinù un slanciu, un abbacinu chì u Mediterraneu ùn hà ancu avutu stomacu à dà li un nome, è chì ancu e carte tenenu à l’appiattu ».  Mi rallegru propiu, di core è di spiritu, ch’ellu sia fattu duttore honoris causa di l’Università di Corsica per sti trenta anni l’autore di u Breviariu Mediterraneu, di tante opere, testimunianze ed azzione, ancu in tempi di periculu stremu, cum’è sottu à e bombe in Sarajevo. Ancu in tempi di custruzzione euromediterranea, cum’è à u Forum Euromed in Napuli. Issa idea maiò, vitale pè sta parte di u mondu duv’è no stemu, hè è sarà a cundizione sine qua non da ch’ella spampanessi l’Università di Corsica, in cunsunanza cù u sviluppu intelettuale, culturale ed ecunomicu di a nostra isula. Intantu ch’elli vultessinu tempi più chjampidi è favurevuli à issa custruzzione geopulitica è culturale, l’Università Pasquale Paoli si attalenta à sviluppà cuntatti, relazione durevule, prugetti  è baratti di ogni modu.

Per contu meiu hè verità lampente : senza issa dimensione mediterranea assunta è integrata da mutore è pruspettiva di a vita universitaria cun tutti i so aspetti, a ghjustificazione,  a necessità è u valore di l’istituzione universitaria perderianu una bella parte di e mutivazione chì anu aiutatu à impone ne l’apertura è dopu, u sviluppu regulare à prò di l’isula è di quelli chì ci stanu è ci volenu campà. Di fatti bastanu e missione di educazione, istruzzione, sviluppu di i sapè è approntu di e risolse umane è tecnulogiche pè u sviluppu di a regione è u benestà di u so populu. Ma s’omu ùn dà capu à u postu di a Corsica in u so circondu di eri è di oghje, si caccia per l’avvene a necessità di un’azzione specifica di l’università in e pruspettive di sviluppu.

Quessa l’idea  si hè accertata pè u CCU in a pratica di i cuntatti, di a riflessione è di e rializazione in campu culturale. Tuttu ùn si pò ammintà di u capitale di e sperienze di i scorsi vinti anni è chì anu fattu chjassu à un travagliu bellu attivu oghje chì ghjè oghje.  È puru, à misura chì u lume và più debule nantu à A Neva, a memoria porta ritratti…

FIGURE DI MEDITERRANEU

Prima di tutte l’altre, si alza a figura di Ulisse. Hè stata ella à impone si in i baratti di u principiu di l’anni 1990. À dà figura à i primi prugrama di cuuperazione INTERREG per noi, à l’università di Sassari è di Corti. À sintetizà i passa è veni di l’estru corsu.  Muvimentu trà u rughjone duv’ella stà a nostra vita d’isulani  è i mondi duv’ella chjama a primura atta à rifinisce u sintimu di esse presente à u mondu. Una funzione simbolica ed urientativa per l’azzione, di accunsentu pienu cun l’imaginariu di i nostri currispundenti mediterranei.

Cusì hè natu un prugrama ODISSEA duv’è no femu, dapoi u 1998, u più di e nostre copruduzzione teatrale è chì fù purtatu à l’iniziu da l’università di Corti, Palermu è Sassari. Teatru mediterraneu in parechje lingue cù Itaca ! Itaca ! (1997), un’azzione sustenuta da a DG XXII di a CE è a CTC, articulata nantu à trè punti : invenzione è scrittura cumuna di un testu in quantu à u Stessu è l’Altru, messu in opera partendu da un passu di l’Odissea d’Omeru ; messa in scena attente à e forme di a teatralità pupulare di e trè isule cuncernate ; partenariatu di i dipartamenti d’arte di e trè università è attori di e trè situazione. I passa è veni di Ulisse ci detenu u dissegnu generale di l’opera distinata à figurà un itinerariu di riacquistu criticu di i temi culturali è di u tema linguisticu ch’ella innalza spessu spessu a nuzione è a rivendicazione d’identità. Ulisse hè vultatu puru puru nantu à u so isulottu Itaca bramatu tanti anni, ma ùn ci trova nè a lingua nè i valori di una volta. Principia un altra odissea, più periculosa chè a prima postu ch’ella li cumanda di tumbà i mostri ch’ellu si porta in sè, s’ellu vole un ghjornu vede spuntà un’altra Itaca. Un’Itaca da inventà.  Sò venuti dopu Ciclopu (1998), Dionomachia (1999), Memoria di l’Acqua (2000), U Medicu stranieru (2001) è dapoi isse date, omancu una creazione à l’annu.

U CCU si hè fattu dinù attente à e realità literarie di u Mediterraneu è si hè creatu un dialogu veru, cuncretu è prugressivu. Senza fà u passu più grande chè l’infurcatura. U prugettu di prima hà fighjatu ver’di a Sardegna ; dopu e Baleare è po’ a Sicilia, cù una BIENNALE DI L’ISULE per quattru edizione. Ci anu participatu catalanu, corsu, sardu è sicilianu. Principiata cù un’iniziativa corsusarda (1995), è prulungata cù l’entrata di e Baleare (1997) hà dinò accoltu a Sicilia da u 1999 : un cuncorsu gestitu da quattru ghjurie in e varie situazione isulane. Ogni bienniu pruchjamazione di e classifiche è accolta di ghjurie è laureati in Corti. À l’ultima tappa di a Biennale vene l’ora di a publicazione : Vicini (1997), Scunfini (1999), Isule literarie-Des Iles littéraires (2000), Des Nouvelles d’IMEDOC (2001), è po’ si entre in a pruduzzione regulare allargata à una quindecina di lingue: Un itinéraire littéraire en Méditerranée (2002), Une Journée de littérature en Méditerranée (2003), è tira avanti è tocca. Piacè chì ùn si pò mancu crede, cù u sviluppu dinù di un’attività d’intertraduzzione trà una quindecina di lingue.

In u vicinatu di a Corsica, in issu ambiente di cuuperazione si hè accertatu cusì, cum’è un arcipelagu chì ci era ma chì ùn si era vistu, un territoriu favurevule à a cuuperazione trà l’isule di ste parte. Di u Mediterraneu.  Di u Mediterraneu Occidentale. L’isule di u Mediterraneu Occidentale.  Si hè pussutu ancu crede chì a vuluntà di i rapresentanti pulitichi d’isse quattru situazione isulane si pudia fà sente da l’Europa. U prugettu « IMEDOC » si pensava ch’ellu pudia diventà prugrama, u territoriu cumpostu da isse isule regione cun statutu particulare ricunnisciutu da l’istituzione europee è signatu da l’insularità. Di un colpu, ùn si ne hè più intesu parlà ma hè firmata a riferenza cù u ricordu di a vuluntà cumuna di e regione cuncernate. Ci hà da vulè tempu è forse pazienza, ma a strada a ci avemu insignata. D’altronde ùn nascerà nunda perchè si sarà solu annunziatu. Ci vole à mette e mani in pasta, tutti i ghjorni. L’urganizazione pulitica è a ricunniscenza bramata veneranu tantu più ch’elle saranu arrimbate à i baratti cuntinui anticipati da una vintina d’anni. È u barattu culturale hè fundamentu sodu pè issa custruzzione. Hè u sensu di e rializazione digià fatte è di quelle ch’è no pruvemu à fà avanzà. Ùn hè solu u piacè ch’ella dà sempre l’azzione culturale cuncreta è u so sboccu in termini di pruduzzione. Hè dinò ch’è no simu cunvinti ch’è ciò ch’è no femu tutti i ghjorni in issu sensu custruisce l’avvene in relazione cù issu mondu riferenziale di u Mediterraneu.