Pari sì, pare nò

      A Cunfraterna di I Strepitosi era in sussurru da dui ghjorni. Era annunziata a Cunfaffa di I Bagiani, invitata da mesi è mesi à vene à sbichjerinà inde a Sapara Maiò per mèriti eccezziunali. L'adunita ùn s'era mai pussuta fà, sempre rimandata da una simana à l'altra. Falati à cavallu da i so stazzi è i so orii muntagnoli, sproni in pedi, l'omi scalavanu à pocu à pocu; eranu vestuti di piloni novi framanti, berette misge in villutu rossu, saraghette turchine, braghe verdi pillicciute è sole di crudicciu ligate. E donne s'avianu buscu un suppulu d'indianella, vindendu e so trecce à l'incettaghji, per pudè dà qualchì risaltu à i marinossi neri venuti da l'antimammoni. Incavalciate anch'elle nantu à ghjumente bianche ch'elle avianu mantenute à castagne secche tuttu l'inguernu per falli u pelu lisciu, s'eranu avviate à u fà di u ghjornu. Entravanu ad una ad una in a Sapara, u staffile à pomu d'argentu ligatu à a vita, à tempu decise è tranquille.

I Magnifichi Strepitosi si facianu appena aspettà, cum'è di ghjustu, è I Bagiani ragiunavanu intantu cun i guardiani di a Sapara, ghjente à la manu, pacifichi è cù u surrisettu intesu di quelli chì ne anu vistu soli alzassi sopra à i monti.
In più bella, appena di ruminicciu, d'emuzione, guasi di parapiglia è teni, eccu ch'elli affaccanu i Magnifichi Strepitosi, spampillulanti, in mantellette di seta celeste è ghjambali bianchi arracamati. Qualchì cavalcatrice intrattene un sanghjozzu, un'altra sustene u so core punenduli nantu una manu chì trimuleghja.
A Cunfraterna s'accoglie, l'ochju alegru ma sulenne. Saluta a Cunfaffa di I Bagiani, piuli intimichiti, li rammenta quant'ella hè di primura a so presenza oghje quì, chì s'anu lasciatu grotte scritte è sumenti per ghjunghje sinu à Sapara Maiò à testimunià chì i stazzi è l'orii fermanu u locu santu è fidu di u sacru mantenimentu. Avà a Cunfraterna cunsegna una reliquia à ogni Bagianu. Tutti fratelli tutti ribelli. Ottu omi è quattru donne ricevenu l'alta cunsecrazione : una cartapecura (per ghjente di i stazzi hè ciò chì li face piacè), intarsiata, smaltata è imperlata.

       Solu chì pè e trè anziane, nè intarsiatura, nè smaltatura, nè imperlatura. Dice chì ùn ci ne era più in a Sapara Maiò. Elle anu sbuffittatu appena è si ne sò turnate à filà a rocca, aspettendu u so revenge porn. L'omi anu risu.

Chjuppata Merlata

(0.00€)