A Nunziata – U 25 marzu

A Nunziata – U 25 marzu

Oghje hè un ghjornu assai speziale, perchè chì hè u mo nataliziu ma ghjè ancu u ghjronu di A Nunziata. Per quelli chì ùn la saparebbenu, A Nunziata hè u ghjornu chì l’Anghjulu Gabriele s’hè manifestatu à a Vergine Maria pè annunzià li ch’ella purtarebbe u bambinu Ghjesù.


Hè un ghjornu di celebrazione, di gioia è di sperenza, chì ci ramenta  l’impurtenza di l’annunziu di l’anghjulu è di a nascita di Ghjesù Cristu.
Di sicuru, hè ancu un ghjornu assai speziale per tutta a ghjente chì festighjeghje u so anniversariu oghje. Hè u ghjornu pè piglià u tempu di riflette à tuttu ciò ch’o n’emu fattu durante l’annu scorsu, i mumenti di gioia è di tristezza, à tutte e sfide cn’o n’emu superatu.


Hè dinù l’occasione di celebrà e persone chì sò impurtante per noi è chì eranu à fiancu à noi pè tuttu l’annu. Hè un ghjornu pè sprime a nostra gratitudine è u nostru amore per quelli chì ci sò vicini.


Allora, chè vo festighjessite u vostru propiu nataliziu o quellu d’un’altra persona, vi pregu una ghjurnata piena di felicità, d’amore è di festa. Chì ‘ssu ghjornu vi ricordi quante site tenuti cari è apprezzati, chì site una persona impurtante è preziosa in a vita di l’altri.


Felice anniversariu à tutti quelli chì celebreghjenu oghje è chì ‘ssu ghjornu sia pienu di benedizione è di sorprese maravigliose. Eiu cum’è a sapete avà s’è sequitate i mo scritti, sò nata u ghjornu di A Nunziata, sottu à a chjesuccia di A Nunziata di Canari, à 6 ore è mezu di matina. Forse chì hè per quessa chì dapoi mi piace à dorme a matina !! Era a prima è a mo mamma avia paura di parturì… Sò nata in a casa famigliale di e mane di u Duttore Ajaccio. Tutta a so vita a mo mamma s’hè ricurdata e so parolle quand’ellu hà dumandatu à u mo babbu di cullà in u so cabinettu à circà li un acu è u filu…


Bona festa di A Nunziata à tutti i credenti chì celebreghjenu issu ghjornu benedettu. Chì a grazia di Diu sia cun voi è chì ‘ssa ghjurnata sia piena di pace è d’amore, di lume è di felicità per ognunu di voi.


È cum’ella dicia a mo mamma, « Diu, in prima s’hè fattu a barba à sè è dopu l’hà fatta à i so apostuli »… allora,  felice anniversariu à mè !