A SIMANA DI A LINGUA

Corti, Universita, Mercuri u 06.06.2012

Scontri di 30.06.2012

U CCU hà participatu cun primura à a

SIMANA DI A LINGUA CORSA DI A CTC

    Un prugrama zeppu è diviziosu hà permessu di accoglie trè iniziative impurtante sia pè u piacè ch’ella dà l’occasione di u scontru in giru à l’arte, sia pè a causa di a lingua corsa, bella affullata quand’ellu ci hè ghjente è parolla chì và…

    A ghjurnata, hè currisposta cù l’intenzione :

    1) U DVD PUESIA CORSA hè statu presentatu cum’è previstu, à posta pè a SIMANA : parechji di i pueti inclusi in u DVD eranu presenti è si hè pussutu presentà un’opera chì averà usu ancu pedagogicu. Ci accunsentenu trà altri parechji maestri è prufessori LCC. I DVD eranu dispunibuli pè u publicu è sò distribuiti di gratisi.
Nantu à a basa d’issa materia digià accolta è a struttura di u DVD, u serviziu « cumunicazione » di l’Università metterà in ballu un Purtone numericu di a puesia corsa : l’associu di u CCU preparerà i cuntenuti, u serviziu di u CCU purghjerà u fundale è i mezi tecnichi (filmi è regia) , cumpusizione filmetti), u serviziu Cumunicazione l’inserimentu di i materiali in una pagina speziale di l’ENT (rubrica « Vie étudiante »).

   2) OFELIA, pezza di Antoni ARCA (Alghero) adattata in corsu, hè stata creata à posta pè a SIMANA issu ghjornu, ghjucata da a truppa di U Teatrinu.
   Eranu dispunibuli pè u publicu i cinque libretti di a cullezzione « Piccule forme teatrale » elaburati in partenariatu trà u CCU, l’Associu di sustegnu CCU è l’Associu Corsu di l’IITM. Issa opera face parte oramai di u prugrama TEATRU OFF distinatu à i prufessori è maestri di cullegi è licei chì accumpagnanu periudicamente i so sculari in a sala Natale Luciani. I libretti sò dispunibuli pè u publicu è sò distribuiti di gratisi

   3) LITERATURA CORSA D’OGHJE, presentazione di libri cun presenza di l’autori è di l’edizione ALBIANA hà permessu un bellu barattu nantu à u tema. U dibattitu, filmatu integrale, hà permessu di mette in lume i caratteri cumuni è e pruspettive di una pruduzzione in lingua corsa chì t’hà, à traversu e diferenze di stili, di generi è di persunalità literarie, un’unità culturale dinamica chì permette propiu di insignà l’esistenza di una « Literatura corsa ».
Eranu presenti 3 di i 4 scrittori eletti pè u « Premiu di i lettori CTC » :

  • P.Gattaceca : Tempi di rena, puesia
  • J.Y.Acquaviva : Ombre di guerra, rumanzu (dapoi sceltu, u 13.06, Premiu CTCdi i Lettori  2012).
  • G.B.Giacomoni : L’Ortu di e mo brame, rumanzu
  • G.de Zerbi : U Rimitu di Collu à Boziu, rumanzu