SPASSIGHJATA LITERARIA : BIGORNU

 

BIGORNU U MO PAESE APPICCICATICCIU

 

In Canale eiu sò nata

Paese di Castagniccia

Un ghjornu ne sò andata

In sti lochi di rasiccia

O cusì bella cuntrata

Per sempre attaccaticcia

 

Omu m'anu prisentatu

Bigornu di a Custera

U so collu inarialatu

Francatu d'ogni manera

In a storia rinumatu

Da a pianeta intera

 

Nant’a strada di Muratu

Sò trè case ùn po' spiccate

Bellu situ acciucciulatu

Petrapola fù chjamatu

Avà per mè locu amatu

Un paradisu l’estate

 

Cughjacce è a so funtana

Dolce spaziu di riposu

Quandu ci hè la sciappittana

Vulenteri eiu ci posu

A so aria fresca è sana

Guarisce u più lagnosu

In e Teghje San Clemente

Da tutti hè onoratu

Tenenu focu ardente

Di u fornu inceppatu

Stu paisolu credente

Rispetta u so passatu

 

Funtana Gola surgente

A so fonte hè ricercata

Allora si vede ghjente

Quella ch'hè allontanata

Chì piglia l'acqua currente

Di Pelva duv’ella hè nata

 

Piantemu in l'Annunziata

Vicin'à u campusantu

Cappella ch'hè dedicata

À Maria un incantu

Una ricchezza passata

Chì hà un valore tamantu

 

In Santa Maria Assunta

Di u paese lu core

A chjesa l’anni affrunta

L'aiuta bè u Signore

Vita è morte aghjunta

Prechenduci cun fervore

 

L’anziana scola amata

Mez'à parechji casali

Ella tantu rigrettata

Ci campa mondu avali

U merre l'hà trasformata

Cateraghju o quantu vali

 

Casanova oghje chjosa

Pienghje u tempu landanu

Cusì grande è orgogliosa

Ci stà un paese sanu

Aspetta l'ora preziosa

U ritornu di l'Umanu

 

Eiu mi sò 'namurata

D’un paisolu ghjuvellu

U ghjornu ch’o sò falata

À visità San Marcellu

Fors'una cumare fata

L'hà dipintu à u pinnellu

 

In Roya San Bastianu

Festighjatu cun passione

Ellu ghjè u guardianu

Di l'antica tradizione

Bigornu hè cristianu

Mostra la so devozione

 

Ficaghjola chì peccatu

D'inguernu hè guasi solu

Ognunu si n'hè andatu

In cità luntanu à Golu

Ma si sente disgraziatu

D'ùn esse più muntagnolu

 

Ogni casa rinnuvata

Ingranda di più l’Amore

A so ghjente ritruvata

À Bigornu face onore

Tutta persona vultata

Ne divinta ambasciatore.

 

Cathy CAMPANA