Una primura di Cathy CAMPANA:

E CABINE À LIBRI, IN CORSICA

 


     Vi vogliu intrattene di ste cabine telefoniche ch’è vo trovate in i carrughji di Bastia, colme di libri.

L’idea ùn hè micca nata quì in Corsica, per una volta u bonu vene d’altrò.

Si tratta di barattà i so libri trà lettori appassionati, sustene un'economia di a spartera, di u donu è dà una seconda vita à issi libri chì, aspessu, s'annoianu in i placcà.

Quelli ch'avianu previstu a morte di u libru à prò di l'informatica, si sò sbagliati.

Ste scatule danu torna u gustu di a lettura, favuriscenu u leame sociale è u rispettu portatu à isse vechje opere.

Da ch’elle sò state installate isse cabine, l'aghju osservate cù interessu, circhendu à sapè qual'era a manu chì venia à piglià o à pone libri.

Una volta mi sò ancu trova à discute vicinu à sta bibbiuteca originale, a vera ricchezza secondu mè, ghjè u scambiu trà l'umani, scambiu di libri, scambiu di parulle, baratti diversi...

I minuti passendu, o ancu l’ora per esse franca, aghju pussutu fà un’osservazione fine di stu fenomenu.

Pensava chì si leghjia menu, primu errore, c'era un pass’è veni tremendu, i libri cunsiderati cum'è ogetti affascinanti, di valore, solu u cuntenutu valia.

Mi dumandava, da mè à mè, perchè piglià issi libri di rigalu ma un pocu brutti, invece d’andà in una vera bibbioteca ?

Dopu à avè rimarcatu dottori, prufessori, persone cunnisciute, prufessioni senza problema apparente di fine di mese, dopu à avè li visti girà e pagine, pà scopre forse qualchì tesoru, mi sò fermata à bocca aperta ! Quessi, issa ghjente appassiunati, u so scopu, ùn pensu ch’ellu sia statu a gratuità di i libri.

Serà statu d’ùn sapè, ghjunti davanti à ste scatule culturale ciò chì s'avia da trovà ? Mi facia pensà à issi zitelli chì si campanu aprendu i Kinder.

Ghjè cumuvente per parechji dinò di pensà chì stu libru hè statu cumpagnu, un certu tempu, d’un altru. Vale à dì, ci hè una lea, un testimoniu, fughje tandu l’individualisimu.

 

Oghje per certi orgogliosi u fattu di piglià libri vechji hè una vergogna, ma altri ci trovanu u so contu.

Un ghjornu, credite mi puru, si comprerà menu robba nova, u scambiu serà privilegiatu. A pianeta ci guadagnerà, ma ancu l’Omu.

Cathy CAMPANA