Ghjacumu FUSINA

UN ARTE DI ESSE È DI CREÀ

Ghjacumu FUSINA volta nantu à un itinerariu riccu di furmazione è di spressione varie. Sta ragiunata ch'ellu offre cun INTERROMANIA ci permetterà di seguità parechji chjassi duve a direzzione di furmazione è spressione persunale si contra cun varie persunalità è currenti culturali è puetichi chì da l'anni 1970 marcanu è facenu a vita intelettuale è culturale di a Corsica dentru à l'isula è fora, in un barattu permanente trà forza di l'affirmazione, delicatezza di u risente è amore predilettu di a nuanza in a spressione. Ci porta à riflette nantu à i raporti cumplessi trà puesia è cantu, aldilà di i palmares di a SACEM; à seguità i viaghji di l'estru pueticu è i ribombi trà una lingua è l'altre. "Pastore è Pariginu, Citadinu  è Paisanu, Salvaticu è Suciabile", eccu cum'ellu si definisce ellu stessu. A finezza di u so dì pueticu rispechja a ricchezza di una persunalità chì ùn si vole cunfonde cù u mendu di e simplificazione atte solu à impuverisce mente è vita.