"LABIRINTU"

 

"Pedipuntà. Lancià si timiconi, à bracce tese, palpetule mucate da stu stracciacciu fangosu. 

I sensi insercititi. Avanzà.

Un sisu di fungu t'empie i nari sin'à intisichì ti u stomacu. Ùn vole dì, avanzi. Un pede chjama l'altru. E to mani cercanu appoghju in latu. Brutta sensazione freda, umida. T'accunsente l'appoghju ma temi ciò chì ti vene di punta. 

Senti un trattettu, u ti rispiri. Li puzza l'ansciu à quessu u trattu. Avanzi. 

Iè, ai trovu puru mezu d'avanzà: a manu dritta à pasponi contr'à u scogliu umidu è terrosu, a manu manca tesa, à a cechetta. 

In pianu, sott'à i pedi, debbule ùn ne senti. U debbule u senti in tè. Ti stringhje u core u debbule. Scorda ti ne. Tomba la a debulezza. Avanza.

S'hè accarnatu u stracciu. Topezzu, funtanelle è palpetule ti brusgianu. Ùn ci pensà più. T'assulpa pianu pianu u stintinu di a sapera. Lascia ti assulpà. Lascia ti viutà u cerbellu. Avanza.

È dopu? S'ellu ci vulissi à vultà? Ariana ùn ci ne hè statu pè tè. À stacche viote sì. À tè, mancu ti ci hè vulsutu à perde u filu... Megliu cusì. Morta a mente, morti i rimintulimi. Tantu ùn vale à ramintulà, à tarulà si u cerbellu. Viota lu. A ci ferai infine à ùn pensà più? Avanza.

 

Stranu l'affare, ùn senti più nè freddu, nemenu umidità. Ùn risenti più nunda. Sì allegeritu. Era ora d'allegerì si appena. S'ellu ci fussi manera di vulà... 

Vulà? Sottu terra? Vai, vai! dì la puru chì tù l'ai persu u filu. Avanza!

 

Silenziu. Solitudine. Asserinatu sì. Tepida l'aria avà, t'ingutuppa l'essere d'uatta. Viaghji.

Sempre à paru viaghji. Ma ti pare ch'ellu strittisca u viotulu. E to mani alliscianu mure lisce lisce. Pensi à una cuchjoppula, quella di a lumaca. 

 

È da li ! Sempre à pinsà. À rombu di pinsà venenu i penseri. T'ai da truvà inchjustratu sì. Tamantu viaghju per inchjustrà si? Pazzu chè tù sì. 

"Menu pazzi si n'affuna" trumbittava mammata. Viaghja. Zittu è bassu.

Tantu ùn parli più. A parolla l'ai persa. A to lingua dinù quella mane. Ai apertu a bocca, t'hè scappatu un barbalescu eppo più nunda. U veru pesciu sì diventatu. Parlavanu l'altri pè tè. Tandu, sì assurdatu dinù, fà ch'ùn li pudia o ùn li vulia più sente. 

 

Avanzi. Attenti. Qual'hè chì sà ciò chì t'aspetta quì? È s'ellu ti s'inguantassi qualchì mostru...a ti senteresti di dà li pettu...

Sicura! Ti ghjuverebbi ancu per una incetta tè! S'ellu ci fussi manera di sfucà si appena!  Mai ùn t'hà intimuritu u salvaticu chì sai chì tù l'ai in tè. Venga puru u mostru! ma quì nisun sisu di salvaticu, nisun alenu in la bughjura, ùn si sente un riattulu.

Notte ceca, friscura è silenziu.

 

Eccu. 

Infine, in sta cuchjoppula di lumaca, u calore ti si piglia. Ecculu u benessere. 

A luce dinù.

Cumu serà? À ochji chjosi vedi a luce tù? Eppo chì luce !

Una luce strana...è meravigliosa, tale un calore strasurdinariu chì t'empie. Sì saziu. 

Saziu di sole sottu terra sì.

 

In più bella senti a forza. 

Una forza tremenda, più forte assai chè quella chì ti s'hà purtatu quì in lu core di u chjoppulu, in la ziglia. 

Issa forza miraculosa ti cummanda d'apre l'ochji. 

Inguanti u stracciacciu chì t'accinghje u capu, si stacca di a to pelle senza mancu straccià la. 

 

Era ora chì tù avissi ghjalabbu d'apre l'ochji.

 

Volti tondu. Vedi. Infine vedi o vedi di novu. 

Tuttu novu vedi. È tandu si scioglie a granitula. Tandu ti metti à corre. Corri, corri, volti à core scioltu à ritruvà u sole. U veru sole. 

È versu l'alba nova, voli."

Maria Lucia CALLIGARI