À l’entre di u mese, u CCU hà urganizatu un mumentu di scontru è ragiunata ingiru à i 4 libri in corsu scelti da i lettori di Corsica. Isse seanze di letture animate in e varie bibliuteche è mediateche durante a prima tappa di u premiu sò sbuccate nantu à voti chì anu ritenutu sti libri quì:
Ieiettu, Guidu BENIGNI, Albiana Editions.
A fanga è l’oru, Francescu FERRARA, Editions Le bord de l’eau.
I Misgi, Ghjacumu THIERS, Albiana Editions.
Mille Mille ! (1000 induvinelle à bisticci è parafanfule), Ghjiseppu TURCHINI, Albiana Editions.
Issu scontru hà permessu di cunnosce megliu l’opere ritenute è, di sicuru, di ammintà e tematiche, temi, sugetti trattati ind’è sti libri.
L’animatore di issa ragiunata, Alanu DiI MEGLIO, si hè attalentatu à mantene sempre u discorsu trà u particulare di ogni opera di u listinu sceltu è po u generale di e lingue, culture, fatti è persunalità, reale o imaginarie mosse da issi puemi, rumanzi è induvinelle. I participanti si sò pussuti sprime in quantu à u prugettu di ogni libru è u fondu duv’ellu và à ciuttà estru, fatti, persunagi o azzione. U chjama è rispondi cù a sala hà permessu à ognunu di dì a soia è si hè pussutu sente cusì testimunianze è parè di Patrizia GATTACECA, Paulu Felica NASICA è Ghjuvan Guidu TALAMONI.
Ramintemu chì dopu à u votu chì si face in stu mumentu ind’è tutte e bibliuteche di Corsica saranu ritenuti dui tituli. Dopu, i cumitati di i Lettori aduniti in ogni locu di Corsica urganizeranu scontri è baratti cù i dui “finalisti”. L’ultima tappa, à u mese di ghjugnu chì vene, si farà in a sala di deliberazione di a CTC cù u votu di tutti i rapresententi d’issi cumitati è tandu sarà sceltu u laureatu di u PREMIU DI I LETTORI DI A CTC.