Versione :
Corsu

I SUSSURI DI BASTIA : CUMINIÒ È FUCARÈ

Per voi beati chì site troppu giòvani per avè cunnisciutu a festa di a Cuminiò ind'i tempi in Bastia è quella di i Fucarè di san Ghjuvà, è per voi disgraziati chì ùn avete a furtuna d'esse bastiacci, u nostru Cunsiglieru generale di Terranova, Rispunsèvule municipale di u Patrimoniu è iniziatore di u magnificu Almanaccu di e tradizione di Bastia, Battì Raffalli (i so eletti hè megliu à alliscialli chì ponu ancu ghjuvà) hà sculunnatu quale hè chì sà induve stu filmettu chì vi mostra ste duie manifestazioni. Voi, lettori di Pesciu Anguilla di Dalzetu cunniscite :

«A Cumunione ebbe locu u ghjornu di Corpus Domine. A mamma s'era messa in fruzu per vestelu d'una bella vestitoghja di pannu negru, c'un bracciale à frange d'oru. Tuttu Bastia era in sussuru. A prucessione partì da San Ghjuvanni, si rincuntrò nant'A Traversa cun quella chì scendia da Santa Maria. Una pigliò u seguitu di l'altra. Preti è frati, sore è bighine, cumunicanti è cunfraternite di tutt'e sorte marchjavanu, ognunu purtendu u so candelu accesu in manu. A folla immensa di u populu seguitava anch'ella, pietosa è ricolta. U regimentu in guarnigione avia mandatu trumbette è tamburi chì sunavanu Aux champs. »

Voi, passiunati di Ghjacumu Thiers, quante volte averete lettu in A Funtana d'Altea :

« A festa di i Fucarè era vicina. Si era capulatu a medità di ghjugnu. U carrughju era in sussuru più chè mai, chì ci vulia à curà u tesoru di i cartoni, carree sbrembate è anticogliule riguarate à porta à porta da un mese in quà... In i recintuli ch'elle facianu e corte, trà una cosa è l'altra, c'era sempre da graspullà qualchì tavula o un restu di carrigone scurdatu custì da un pighjunante, chì avia pensatu, durante l'anni è l'anni, di pudellu purtà ind'è u bancalaru... Ma u più chì ripurtava era a visita ind'è e butteie. Ogni cummercente di u carrughju si facia un duvere di purtà u so affollu à l'intrapresa zitellesca...Tuttu tenia à l'altezza di u catastu di ogni banda, di ogni carrughju.U soiu ci vulia à ingrandallu sempre di più, ch'ellu fussi più bellu è più furnitu chè quelli altri : e spie andavanu da unu à l'altru è dicianu chì San Ghjisè, Terranò, A Piazza è Paratoghju era miraculi ciò ch'elli avianu pussutu trascinà nantu. »

Ècculi in fiure vere sti dui mumenti di a vita bastiaccia cù i preti di l'anni 60, Monsignore Mattei Lota, prete Toto Mattei, prete Bonetti, Prete Santini, a catechista madamicella Pierangeli, è i Fucarè di a listess'èpica, cù u strascinime di e cascette è monsieur Belgodere, davant'u so bellu magazinu, piazza d'U Mercà chì face nece di spanticà i sgaiuffi.

Speremu ch'è vo vi camperete à guardà cum'è no ci simu campati.

è per quessa cliccate quì sottu!

http://www.youtube.com/watch?v=J47fS3XU2PY&feature=youtube_gdata_player

Ghjermana DE ZERBI