Versione :
Corsu

L'ATTORE SECONDU P.POLI

UN'ATTRICE-CANTARINA SI RICORDA

U PARÈ DI UNA ATTRICE CHÌ CANTA...

    P.Poli ramenta ch’ella hè intruta ind’è U Teatru Paisanu in u 1983 in una dimarchja spuntanea, piena à ammirazione pè l’estetica è u travagliu di Dumenicu Tognotti. Piena à timore dinù, chì Tognotti dumandava di ripiglià, di rivisità u cantu tradiziunale circhendu à ùn interpretà lu più, ma à travaglià ne a sputichezza prufonda. In fatti Tognotti vulia rende issa sputichezza à u cantu chì a si avia persa stacchendu si da u so cuntestu suciale. A quistione tandu era di circà cumu porghje li dinù issa sputichezza custì. P.Poli spone e ligne di forza di u metudu :

  • Scurdà si di tuttu ciò ch’ella avia amparatu cù a so furmazione di musica classica.
  • Travagliu in basa à l’impruvisazione : sempre sempre principiava cù un eserciziu fisicu longu è zeppu. U scopu era di liberà si, spuglià si da e solite inibizione.
  • Era in issu mumentu di desinibizione ch’ella sbucciava l’impruvisazione
  • U mettore in scena, tandu, intervenia custì : era attente à tuttu : esame di a voce sinu à u minimu inflessu ; osservazione di i muvimenti, gesti è reazzione curpurale, rumpiture è stinzate di voce, capite da segni di l’emuzione di ogni modu (gioia, tristizia, pena, suffrenza, gudimenti è piacè).

    Si travagliava isse varie parte ed ella dice ch’ella scupria e voce tutte ch’ella si avia à dossu è chì li sunavanu indrentu à a persona, à tal puntu di definisce u curpurale da cascia di risunanza. Era per cusì dì un'esplurazione di a persona fisica da pudè ghjunghje à una spressione sputica : u difficiule, dice ella, era di avè l’ardì di trafrancà a so frizzione, di andà al dilà di a paura è di avè a fronte di francà i so limiti. È dice quantu ellu era piacè è gudimentu l’attori quand’elli tuccavanu inseme issu puntu chì era verità è sputichezza piena.

Cunclude dicendu chì à Dumenicu li piacia à dì chì ellu era statu furtunatu scuntrendu à Grotowski è chì ella, a so furtuna era stata di scuntrà à Dumenicu. « Mai più aghju cantatu cum’è prima. Da tandu cantu cum’è un attrice. Mai più aghju scontru à qualchissia cum’è Dumenicu Tognotti ».