PUESIA: cù i versi di Cathy CAMPANA

Tempu d'elezzione, dopu à u siscu

 

Eramu quasi per more

Chjos'in casa spaventati

Ma sò rivultate l'ore

Quelle d’issi passiunati

Ch'ùn sentenu batticore

Chè pà li so candidati

 

U siscu avia impeditu

Di schjuppullà l'elezzione

Ognunu impauritu

S'impippò di a selezzione

Cumbattimentu svanitu

Addiu pulitic'azzione

 

Ma l'omu hè cusì fattu    

Si scorda di u passatu

Eri à domu ciattu ciattu

Eccul' avà tracambiatu

Nasce in furia u barattu

Da morente à affiliatu

 

Tandu li puliticanti

Si spartenu belli posti

Micca sempre eleganti 

Bocca à bocca li opposti

In goffi conti mercanti 

À periculu esposti.

 

 

Cathy CAMPANA

 

 

U RUSIGNOLU HÈ MORTU, QUAL'HÈ CHì CANTERÀ ? 

 

A voce di Rusignolu

S'hè alzata in l'Alta Cima

Di Zilia allitaghjolu

C'incantava a so rima

Corsica porta lu dolu

È li mostra la so stima 

 

Notte in chjam'è rispondi

Quant'ellu ne hà passatu

Cū li so versi fecondi 

Musa Corsa sempre à latu

Ghjochi ricchi è profondi

Ùn ci mancava lu fiatu

 

À Ghjesù lu so lamentu

L'hà scrittu pà devozione

Sparte cusì u spaventu

Davanti l'abnegazione

Chì stu santu attaccamentu 

Li sia benedizzione

 

Pare chì Roccu Mambrini 

Cantava cum'è l'ocelli

I parenti è li vicini

Si sentenu orfanelli

Ma oghj'ùn hà più cunfini

Vola incù l'anghjulelli.

Cathy Campana