NASCITA È CRESCITA DI A LITERATURA CORSA

Prufessore certificatu di spagnolu è di corsu, Anghjulu POMONTI hà sustenutu cun successu di decembre scorsu un dutturatu propiu rimarcatu  da a ghjuria cun titulu: “La littérature d’expression corse : entre provincialisme, politique et modernité”

 

In listessu tempu escia u so in Lingue è literature vicine: Corsica è Gallur à l’edizione Albiana-CCU (2018). Era digià inclusu in a publicazione di l’atti di unu trà l’ultimi cungressi di i Culloquii Internaziunali di Studii “Ciurrata di la linga gadduresa” fatti in Perfugas (Gallura) à l’iniziativa di Mauro MAXIA.

In a prima parte d’issu libru, u studiu di Pomonti và cun quelli di Alanu DI MEGLIO (“U sensu di una leia”) è Ghjuvan Maria COMITI (“Sguardu nant’à u gallurese d’oghje”), a seconda parte scritta da Mauro MAXIA (pag.167-313) trattendu di l’affirmazione longu à i seculi di a specificità di u gallurese è di a so literatura orale pè u più.

Rapresentendu e nove scritture in a nostra publicazione, u studiu di Pomonti tene un centu di pagine è di più (pag.33-147). I varii capituli Anghjulu l’avia presentati longu à l’annu passatu sottu forma di unepoche di cunferenze. Isse “stonde” filmate à u Spaziu Natale Luciani in Corti anu permessu u barattu trà publicu è cunferenzeru-circatore. Si pò andà à (ri)vede li in e messe à ghjornu di INTERROMANIA di una decina di mesi in daretu.

“A custruzzione storica di una literatura di spressione corsa”

Issu  titulu  dice l’urientazione di l’interrugazione critica. I capituli specificheghjanu issi cuntenuti è si viderà quant’ella hè uriginale un’andatura chì dà a primura à u literariu, à l’incuntrariu di u pensà abituale chì, u più spessu, incalca l’accentu nantu à u fattu linguisticu.

L’affaccà di un scrittu literariu corsu: generi minori è ricuperazione rumantica di u patrimoniu urale: pag.35-75

  • Da a pusia giocosa à e cummediole: a scelta di i generi minori (38-47)
  • Fasa rumantica: è ricuperazione scritta di u patrimoniu uraleLracolte) è criazione “pupuliste” (“literatura di l’almanaccu”) (47-54)
  • U bullore di u “Pre-Riacquistu” (1896-1945) (54-57)
  • A “literatura di e riviste” (58-69)
  • A “literatura di u Sbandonu” (69-71)
  • U sbuccià di u mudernisimu (71-75)

 

Literatura è etnugrafia: u “Mantenimentu”

  • U Muntese: tribbuna ufficiosa di a mossa di priservazione culturale (76-77)
  • A prosa memurialista di u dopu guerra (77-82)
  • “Isulati” nuvatori (82-90)

 

Trà ingagiamentu, tradizione è aspirazione muderniste chì Riacquistu fù? 90-110)

 

A mudernità literaria corsa (110-143)

  • A rumpitura di u Novanta (110-126)
  • A splusione mudernista di u Duiemila (126-143)

Issu studiu è u so cumplementu (a tesa di Anghjulu ch’è no aspettemu cun primura di vede la publicata) saranu strumenti di prima trinca da spiicà è sparghje a cunniscenza precisa di l’acquisti di a spressione literaria corsa. È li daranu di più in più realità in a cultura è u sintimu di a cursitudine.

(0.00€)