Un rigalu di Patrizia GATTACECA

UN PICCULU MIRACULU DI NATALE

Natale, quand’era zitella in paese, era.. hein cum’è per tutti, una festa di famiglia, è di famiglia ancu allargata, duv’elli venianu à veghja i paisani à scumparte bella amicizia, u cantu, u beie è u manghjà. Ghjera un mumentu dinò chì e donne tramandavanu e pricantule di l’ochju o altru. Eccu: eranu cusì i Natali in paese, è po’ un ghjornu... qualchì ... qualchì ghjornu nanzu à Natale, u mo ziu, u fratellu di Babbu, eccu ch’ellu ghjunghje cù un agnellu, è... noi eramu zitelli... ùn sapiamu micca ..chì l’agnellu, era distinatu di sicuru, à esse tombu è manghjatu u ghjornu di Natale. Dunque, per noi pensavamu, cum’elle ci eranu e capre è e pecure ind’è a famiglia, chì ghjera un agnellu chì duvia raghjunghje a banda... Eccu... allora, l’agnellu hà passatu a so prima notte in cantina ... È l’agnellu pienghjia, pienghjia... Era solu... Averà avutu avutu ancu a fame... è noi, eramu quassù in camera... E camare eranu sopr’à a cantina, cù i mo fratelli, chjuchi dinù, quand’emu intesu pienghje l’agnellu, ùn avemu micca durmitu, ...emu passatu a notte à... à pienghjulà, ancu noi, è a matina, quand’è no ci simu arrizzati, chì aviamu capitu chì l’agnellu duvia esse tombu, avemu cuminciatu à pienghje, è à pienghje, è à pienghje, è emu pientu tantu ch’emu cunvintu i grandi d’ùn tumbà micca st’agnellu, chì noi ùn lu vuliamu mancu manghjà. Mancu in burle. Ah allora, emu pientu, emu pientu... è tandu, tandu era Natale...

Anu dettu: “Alè, alè, và bè... Ma chì n’emu da fà avà di st’agnellu? Ùn hà più a so mamma!...” È aviamu una sciocca... ind’è l’ortu... chì avia un caprettu... Allora u mo ziu hà avutu l’idea... di porghje l’agnellu à a capra è a capra si hè lacata fà, l’agnellu hè andatu direttamente à appuppà si à a capra è cusì ghjè ella chì l’hà allevatu. È noi emu vistu cresce, cresce st’ agnellu è chì ghjè diventatu un bellu arghjetu tamantu, è chì ghjè ingrandatu è chì ghjè mortu... di a so morte naturale...

Aviamu fattu un miraculu. Aviamu salvatu quell’agnellucciu di Natale....

à pienghje, à pianghje, à pianghje,

Eccu... a mo fola di Natale

                                                                                                                Patrizia GATTACECA